Arrestimet – Shkatërrohet grupi i trafikut të kokainës në Greqi. Kapoja në Shqipëri

Policia greke ka asgjesuar një rrjet që trafikonte kanabis dhe kokainë në rajonin e Ilia-s, të Greqisë perëndimore.

Policia u ka vënë prangat 11 personave, dhjetë shtetasve shqiptarë dhe një grek, ndërsa ka identifikuar kreun e grupit, një 32 vjeçar që ndodhet në Shqipëri. Dy persona të tjerë janë shpallur në kërkim.

Edhe pse sasia e drogës së sekuestruar me cilësinë e provës, është mjaft e vogël, sipas komunikatës së policisë, grupi ka përfituar nga trafikimi më shumë se 150 mijë euro.
Policia ka zbardhur gjithë skemën e funksionimit të grupit.

Bosi 32 vjeçar e dërgonte kanabisin dhe kokainën nga Shqipëria në Greqi, saktësisht në Athinë, ku e merrte në dorëzim vëllai i tij, me moshë 24 vjeç.

Ky ua shpërndante pjesëtarëve të grupit, që kishin për detyrë ta shisnin. I njëjti person, grumbullonte paratë e shitjes dhe pastaj ia çonte të vëllait në Shqipëri.

Grupi vepronte nën masa të rrepta sigurie, ndërsa komunikimet për caktimin e çmimit të shitjes dhe të mënyrës së trafikimit, bëheshin gjithmonë nëpërmjet rrjeteve sociale për të evituar një përgjim të mundshëm.

Gjatë kontrolleve në banesat e të arrestuarve, në Amaliada dhe Athinë janë gjetur dhe sekuestruar sasi të vogla kanabisi dhe kokaine, peshore precizioni, një presë hidraulike që përdorej për ambalazhimin e kokainës, 2 automjete, 21 telefona celularë dhe një shumë parash prej 2.680 euro.