Berat/Bashkia përfundon ristrukturimin e rrugëve në fshatin Ullinjas

Sinaj: Kemi të njëjtën vemendje si për qytetin dhe zonat rurale

 Pas një pune të gjatë, të mirëstudiuar dhe të mbështetur në afate e programe konkrete, Bashkia e Beratit ka bërë të mundur tu vijë në ndihmë gjithë fermerëve në territorin e saj. Drejtoria e Shërbimeve ndërmori një plan konkret masash sipas së cilit do të rehabilitoheshin rruget nëpër fshatra, duke nisur nga ato më problematiket.

Dje në fshatin Ullinjas, në Njësinë Administrative Otllak, kreu i Bashkisë Petrit Sinaj është ndalur për të parë nga afër realizimin e shtrimit të 200 metër linear rrugë me beton, një premtim i mbajtur ky në fushatën elektorele por edhe tregues i faktit se Bashkia ka njësoj në vëmendje si qytetin, ashtu edhe zonat rurale. Kryetari i Bashkisë Petrit Sinaj ka vizituar këtë fshat dhe vëzhgoi nga afër gjithë punën e bërë në këtë drejtim. Sinaj i shoqëruar nga drejtues, specialistë të drejtorisë së shërbimeve, si edhe nga stafi i tij i ngushtë, të cilët i treguan konkretisht gjithë hapat e ndërmarrë për tu ardhur në ndihmë fermerëve.

Në takime kanë qenë të pranishëm edhe banorë të zonave të cilët kanë gjetur rastin të falenderojnë bashkinë për këtë punë e cila kryhet për herë të parë pas shumë vitesh. Gjatë fjalës së tij, z.Sinaj ka theksuar në komunikimin e tij me banorët se qëllimi i bashkisë do mbetet qënia sa më pranë fermerëve punëtorë të zonës duke nisur me rrugët si mjet i pazëvëndësueshëm komunikimi, për të vazhduar me ujitjen, kullimin, me tregjet dhe me sistemimin e tyre si mjedise ku fermerët do mund të tregtojnë pa kosto shtesë produktet e tyre.

Bashkia sipas kryetarit Sinaj, do të investojë edhe në të ardhmen në infrastrukturë dhe në fushën e bujqësisë, duke patur në qendër të punës së saj përmirësimin e cilësisë së jetës për banorët e saj. Kjo sipas kreut të bashkisë arrihet vetëm përmes një rrugë, asaj të punës dhe përkushtimit në ndihmë të banorëve.