Delegacioni i KLD informon krerët e gjykatave të BE: Të shmanget ndikimi politik në drejtësinë shqiptare

Aktualitet E Mërkurë, 26 Maj 2021 22:52

“Të shmanget ndikimi politik në drejtësinë shqiptare”. Ky ka qenë shqetësimi që ka parashtruar delegacioni i KLD shqiptare i përbërë nga Gjin Gjoni dhe Gerd Hoxha në asamblenë vjetore të rrjetit europian të Këshillave Gjyqesore ENCJ. Në këtë takim KLD shqiptare merr pjese në cilësinë e vëzhguesit. Bordi drejtues i ENCJ mbajti një seancë të posaçme dëgjimi me delegacionin shqiptar ku u informua me të gjithë zhvillimet e fundit në vend.

Përfaqësuesit e KLD shprehen gatishmërinë e të gjithë trupës së gjyqtarëve për të kryer sa me shpejt procesin e reformimit të sistemit gjyqësor por, duke mbajtur parasysh parimet themelore të shtetit te së drejtës, një prej të cilëve është edhe pavarësia dhe mosndërhyrja e pushtetit legjislativ dhe ekzekutiv në funksionimin dhe administrimin e drejtësisë.

Gjyqtarët shqiptarë patën takime me përfaqësuesit me të lartë të gjyqësorit në vendet e bashkimit europian si; kryetari i gjykatës së Kasacionit në Francë, Berttrand Louvel, Lordin John Thomas, Chief Justice i Anglisë dhe Uellsit, etj…, të cilët shprehën shqetësimet e tyre lidhur me klimën e presionit që shpesh herë pushteti ekzekutiv dhe legjislativ ushtron mbi pushtetin gjyqësor.