E mbuloi me batanije dhe pinte raki, flet “vrasësi i grave”

Beqir Xhilaj qëlloi gjatë natës të së dielës me çifte gruan nga martesa e katër, 47-vjeçaren Lumturie Xhilaj, duke e lënë të vdekur në vend. Pas krimit të rëndë, 74 vjeçari e mbuloi me batanije trupin e bashkëshortes së tij dhe u ul në një tavolinë duke pirë raki.

Në komisariat, Xhilaj fillimisht e mohoi se është autor i krimit, duke paraqitur si vetëvrasje, ashtu siç kishe thënë edhe për vrasjen e gruas së parë. 47-vjeçarja është qëlluar me çifte teke tri herë dhe ka qenë e pamundur që të vrasë veten, pasi çiftja duhet mbushur në mënyrë manuale pas çdo të shtëne.

Policia shoqëroi në komisariat 74-vjeçarin, nga ku gjatë marrjes në pyetje pranoi se është ai autor i vrasjes së gruas, Lumturie Xhilaj. Në dëshminë e tij në polici, ai ka thënë se arsyeja e vrasjes ka qenë një debat i momentit mes tyre.

I moshuari është arrestuar menjëherë për veprën penale “vrasje për shkak të marrëdhënieve familjare”, ndërsa çështja pritet t’i kalojë Gjykatës së Krimeve të Rënda.