Gjashtë dekorata “Fisnikëria Tiranase” për personalitete të shquara të Tiranës

Gjashtë personalitete të shquara të Tiranës janë vlerësuar me dekoratën “Fisnikëria Tiranase”, në një aktivitet të organizuar nga Shoqata “Tirana” “Nderi i Kombit”.

Në ceremoninë e ndarjes së dekoratave mori pjesë edhe Prefekti i Qarkut Tiranë dhe Kryetari i Asamblesë së Shoqatës “Tirana”, Shkëlqim Hajdari, i cili e cilësoi vlerësimin një shprehje mirënjohjeje për kontributin e figurave të spikatura të qytetit në fusha të ndryshme të jetës.

Dekoratat iu akorduan personaliteteve me kontribute në kulturë, art, shkencë, arsim dhe bamirësi, duke vlerësuar punën dhe përkushtimin e tyre ndër vite.

Përmes një reagimi në rrjetet sociale, Hajdari theksoi se këto vlerësime janë një mënyrë për të nderuar njerëzit që kanë kontribuar në pasurimin e jetës shoqërore dhe në promovimin e emrit të Tiranës.

“Të vlerësosh njerëzit që kanë dhënë nga vetja për të mirën e përbashkët do të thotë të nderosh vlerat, kujtesën dhe shpirtin e qytetit tonë”, shkruan Hajdari.

Në përfundim të mesazhit të tij, Prefekti i Tiranës shprehu mirënjohje dhe respekt për të gjithë të dekoruarit, duke uruar që kontributi dhe shembulli i tyre të shërbejnë si frymëzim për brezat e ardhshëm.