Gjatë natës së mbrëmshme dhe mëngjesit të sotëm, në rezervuarin “Aksi 2-2” në Funar, niveli i ujit është rritur ndjeshëm, me rrezik për dalje mbi digë.
Bashkia Elbasan, në bashkëpunim me Prefekturën e Elbasanit, Policinë e Shtetit dhe në koordinim me Agjencinë Kombëtare të Mbrojtjes Civile (AKMC), ka angazhuar strukturat përkatëse të mbrojtjes civile. Situata aktualisht është nën kontroll.
Sasia e ujit që po shkarkohet tejkalon prurjet hyrëse, duke u shkarkuar rreth 3 metër kub në sekondë më shumë se prurjet. Si rezultat i ndërhyrjes së koordinuar, niveli i ujit është ulur me rreth 20 cm.
Kryetari i Bashkisë Elbasan, Gledian Llatja, ka monitoruar situatën në rezervuarin e fshatit Branesh dhe ka deklaruar se janë marrë të gjitha masat për të parandaluar përmbytje apo dëmtim të banorëve. Ndërhyrja ka qenë e menjëhershme për të shmangur çdo rrezik potencial që mund të ndikonte jo vetëm Braneshin, por edhe dy fshatra të tjerë në zonën e Bradasheshit.
Megjithatë, situata mbetet e vlerësuar në varësi të kushteve atmosferike gjatë ditës dhe mbrëmjes. Strukturat përgjegjëse, të mbështetura nga efektivë të Policisë së Shtetit, do të qëndrojnë në gatishmëri të plotë për monitorimin dhe menaxhimin e situatës, duke garantuar sigurinë e komunitetit.