Ambasadori i Shqipërisë në Maqedoninë e Veriut, Denion Meidani, ka përkujtuar figurën e Nënë Terezës, duke vënë në pah prejardhjen e saj shqiptare dhe lidhjen e saj të veçantë me Shkupin.
Përmes një postimi në rrjetet sociale, Meidani e ka cilësuar Nënë Terezën si një figurë që bashkon identitetin shqiptar, qytetin e Shkupit dhe përmasën universale të humanizmit.
“E lindur në Shkup Gonxhe Bojaxhiu, Nënë Tereza mori me vete identitetin, besimin dhe forcën e prejardhjes së saj shqiptare, dhe misionin e saj e shtriu në mbarë botën”, shkruan ambasadori.
Në fund të mesazhit të tij, Meidani e përmbledh figurën e saj përmes një mesazhi të shkurtër, por domethënës:
“Gonxhe për ne.
Nënë Tereza për botën.
Shenjtore për njerëzimin.”
Mesazhi i ambasadorit vjen në një periudhë kur në Maqedoninë e Veriut është rikthyer në vëmendje debati për përfaqësimin e shqiptarëve në aktivitetet shtetërore, veçanërisht pas ceremonive të zhvilluara për 35-vjetorin e pavarësisë së vendit.
Gonxhe Bojaxhiu, e njohur në mbarë botën si Nënë Tereza, lindi në Shkup dhe ia kushtoi jetën shërbimit ndaj të varfërve dhe njerëzve në nevojë. Figura e saj u bë një simbol ndërkombëtar i humanizmit dhe solidaritetit.
Për veprimtarinë e saj humanitare, Nënë Tereza u nderua me Çmimin Nobel për Paqe në vitin 1979, ndërsa në vitin 2016 u shpall shenjtore nga Papa Françesku.
Kujtimi i saj vijon të mbajë një peshë të veçantë për shqiptarët, ndërsa emri i Nënë Terezës mbetet i lidhur njëkohësisht me Shkupin, Shqipërinë dhe misionin e saj humanitar në mbarë botën.