Ka kaluar tashmë një javë që pas shembjes së Teatrit Kombëtar. Një javë që ka sjellë shumë zhvillime, protesta e lëvizje qytetare.
Kryeministri Rama duket i vendosur për ndërtimin e teatrit të ri.
Arkitektja dhe aktivistja Dorina Musai e dënon vendimin e qeverisë për shembjen e teatrit, sidomos në mënyrën se si u zhvillua duke e konsideruar atë si krim.
Për Ora News ajo thotë se nuk ka më dialog me kryeministrin, ndërkohë që e ka konsideruar ndërtimin e teatrit të ri në një vend tjetër si absurd.
Musai: Kemi ngritur një kauzë të re që nuk është trajtuar shumë. Këtu ka nevojë për drejtësi dhe transparencë. Qytetarët kanë të drejtë se kush ishte përgjegjës i shembjes së saj. Mendoj se mund të kishim bërë më shumë. Nga ana tjetër them se bëmë çdo gjë që kishim mundësi. Që kur kemi hyrë në objekt gjëja e parë që bëmë ishte të merrnim të gjitha të dhënat arkitektonike të objektit. Përdorëm të gjitha mjetet e nevojshme që të dokumentimin e të gjitha pjesëve të teatrit. Kemi marrë dhe skanimin 3D.
Nga pikëpamja profesionale nuk kam pengje. Unë nuk prisja që kryeministri ta kryente aktin. Gabova dhe në këtë moment, krimi u krye. Mua nuk më intereson se çfarë mendon kryeministri. Që kur futi dhunën në vend të dialogut, unë nuk mendoj që mund të dialogojmë.
Rindërtimi i teatrit diku tjetër është absurd, është një truall për teatrin. Aty duhet ta ketë vendin. Nuk mund ta marrim kauzën dhe ta shpërngulim diku tjetër. Ndërtimi i një teatri të vogël është i pakuptimtë. Nuk mund të luash me këtë dhe të thuash kjo do bëhet një lodër për fëmijë. Qendra historike e Tiranës është dëmtuar shumë. Ka dëme të pariparueshme. Ngulja e kullave në qendër është një makabritet i qytetit. Të dhunosh trashëgiminë për ta zëvendësuar me një godinë të shekullit 21 nuk shkon. Objektet duhet t’i përshtaten vendit, siluetës së qytetit. Futja kështu në mënyrë të dhunshme një arkitekturë moderne nuk është një veprim i mirë.
Në mbështetje të teatrit kanë qenë dhe shumë politikanë opozitarë të cilët kanë qenë prezentë gjatë protestave të zhvilluar këtë javë.
Dorina Musai thotë se kjo çështje ka qenë e politizuar pasi edhe vendimet që janë marrë, kanë ardhur nga politikanë.
Musai: Çështja e teatrit ka qenë gjithmonë politike sepse u prezantua një ligj special. Të ndërtosh një kauzë ku politika ka marrë vendim dhe ka kryer aktet përfshirë dhe bizneset private në një truall publik, dhe përfshihet edhe Kushtetuta, forcat politike nuk mund t’i lemë jashtë. Ato kanë për detyrë që t’i përgjigjen kërkesave të qytetarëve pavarësisht se si i kemi partitë. Unë si qytetare dua që ato të mbajnë pozicionin e tyre që u takon. Qytetari është shumë i dobët tashmë në Shqipëri, pasi nuk është i pozicionuar mirë tani me pushtetin. Kjo kauzë këtë ka nxjerrë në dukje, që ne përballë politikës duhet të jemi më të fortë. Duhet të jemi më të mëdhenj në numër.