Ngjarja në Krujë – Arrestohet polici i burgut, plagosi dajën dhe një person tjetër në lokal

Arrestohet autori i plagosjes së dyfishtë në Krujë. Në pranga ka rënë Oltion Suta 36 vjeç,  banues në Krujë,  polic në burgun e Zaharisë.

Suta, mëngjesin e sotëm, rreth orës 06:45, në ambientet e një lokali  tek një karburant  në afërsi të stadiumit, është konfiktuar me dy persona për motive të dobëta, njëri prej tyre daja i tij.

“Në debat e sipër, ai ka plagosur me armën e shërbimit, pistoletë TT  shtetasit R.Sh.(daja i të arrestuarit) rreth 62 vjeç dhe G.G. (plagosur lehtë në dorë) rreth 47 vjeç, banues në Krujë” sqaron policia.

Të dëmtuarit ndodhen në Spitalin Ushtarak Tiranë ku shtetasi R.Sh. ndodhet nën kujdesin e mjekëve, ndërsa shtetasi G.G. është jashtë rrezikut për jetën.

Gjatë kqyrjes së vendit të ngjarjes është gjetur arma e zjarrit tip pistoletë TT dhe një gëzhojë.

Materialet kaluan Prokurorisë së Rrethit Gjyqësor Krujë për veprime të mëtejshme për veprën penale” Vrasja në rrethana cilësuese” e mbetur në tentative.