Ish-deputeti i Partisë Socialiste, Denis Deliu, vlerësoi se protesta është një e drejtë kushtetuese dhe se qeveria duhet të marrë në konsideratë kërkesat e qytetarëve. Megjithatë, ai ngriti edhe shqetësimin për atë që e cilësoi si ndërhyrje të shteteve të huaja në zhvillimet në vend. “Ka shumë kërkesa të drejta të qytetarëve në shesh që qeveria duhet të reflektojë. Por, e besoj luftën hibride. Ka ndërhyrje nga shtete të huaja dhe këtë e them me bindje të plotë, por edhe me garanci”, deklaroi Deliu në A2 CNN.
Sipas tij, ekzekutivi duhet të ndërmarrë masa konkrete për përmirësimin e kushteve sociale, duke përmendur rritjen e pagave për mësuesit, mjekët, infermierët, policët dhe ushtarakët, si edhe rritjen e pensioneve dhe uljen e çmimit të naftës. Deliu tha se bazuar në përvojën e tij në Komisionin e Sigurisë Kombëtare, Shqipëria përballet me tentativa për ndikim nga aktorë të jashtëm, veçanërisht në një moment që e konsideroi të rëndësishëm për vendin. Ai u ndal edhe te rreth 10 mijë vlerësimet negative të publikuara për restorante dhe hotele në Shqipëri, duke kërkuar një hetim të plotë për origjinën e tyre.
“Një hetim i mirëfilltë i këtyre llogarive, të adresave të Facebook-ut apo adresave të tjera të rrjeteve sociale, është i rëndësishëm në këtë moment. Këto do t’i tregojë hetimi”, u shpreh ai. Sipas Deliut, analizimi i IP-ve, kohës së krijimit të llogarive, aktivitetit të tyre dhe përmbajtjes së shpërndarë mund të ndihmojë në identifikimin e ndërhyrjeve të mundshme nga jashtë. Ai shtoi se fushata të ngjashme dezinformimi ndaj turizmit shqiptar kanë qenë të pranishme edhe gjatë viteve të fundit.
