Ryshfeti 50 mijë euro/ Prokuroria kërkon 4 vjet burg për ish-gjyqtaren

Aktualitet E Shtunë, 22 Maj 2021 19:35

Prokuroria kërkon dënimin me 4 vjet burg për ish-gjyqtaren e Gjykatës së Lartë, Majlinda Andrea, akuzuar për korrupsion në lidhje me një vendim për njohjen e një prone prej 40 hektarësh në Butrint.

Kërkesa u bë e njohur sot, kur organi i akuzës lexoi pretencën për gjyqtaren Andrea dhe bashkëshortin e saj, Odhise Andrea.

Sipas pretencës, prokuroria kërkoi 4 vjet burg për gjyqtaren, plus heqje të së drejtës për ushtrimin e funksioneve publike për 5 vjet. Për bashkëshortin e saj, Odhise Andrea, prokuroria kërkoi dënimin me 5 vjet burg plus heqjen e së drejtës për ushtrim të detyrave publike për 5 vjet.

Për të akuzuarit e tjerë në këtë proces, prokuroria kërkoi 4 vjet burg për shtetasin Petraq Dashi, 2 për Ilia Çabirin dhe 1 vit burg për Eleni Lino.

U kërkua dhe konfiskimi i pasurisë prej 50.000 euro, shumë e pretenduar e marrë si ryshfet. Pas pretencës, Gjykata ka caktuar seancën e radhës në 23 maj në orën 12:00