Maestro Armaldo Kllogjeri nuk fitoi, por shkrimtari Kume që mori mandatin: Listat e hapura s’ishin për artistët, fama nuk mjafton

Maestro Armaldo Kllogjeri, aktorja Julia Ilirjani apo shkrimtari Loer Kume ishin në listat e partive politike për zgjedhjet e 11 Majit. Vetëm ky i fundit ia doli të sigurojë një vend në Kuvendin e katër viteve të ardhshme, falë pozicionit komod në listat e mbyllura të PS. Krahas penës, Kume është gati të veshë kostumin e ligjvënësit.

”Shkrimi është një mënyrë të komunikuari dhe një mënyrë e të bërit të gjërave mirë, sipas mendjes tënde. Të bërit politikë është një mënyrë të komunikuar tashmë në grup. Kjo është forca e madhe e politikës. Të përfaqësosh vullnetin e shumë njerëzve, të cilët më kanë besuar shumë edhe gjatë takimeve, kam parë ngrohtësinë dhe besimin që më kanë dhënë. Besimi është ‘i frikshëm’, të ngarkon me një përgjegjësi që ti tashmë nuk je vetëm, por je për njerëzit”, tha shkrimtari Loer Kume.

Të ardhmen në politikë Kume e sheh si sfidë dhe mision ndaj artit dhe kulturës. ”Energjia ime që orientohet drejt kulturës sigurisht që do pasqyrohet në Kuvendin shqiptar. Biblioteka është një kauzë e madhe e çdo durrsaku, edhe e atyre që nuk lexojnë. E kërkojnë që Durrësi të ketë një bibliotekë të re. Do bëj çmos që është në vullnetin tim, por edhe në vullnetin e institucioneve që të ndryshojmë realitetin e Bibliotekës së Durrësit”, tha Kume.