Të ardhurat nga taksat nacionale, 11.5 miliardë lekë në tremujorin e parë

Të ardhurat nga taksat nacionale gjatë periudhës janar-mars 2026 u realizuan në vlerën 11.5 miliardë lekë, duke arritur 97,6% të planit të parashikuar për tremujorin e parë të vitit.

Sipas raportit mbi treguesit fiskalë të publikuar nga Ministria e Financave, të ardhurat nga ky zë rezultojnë rreth 500 milionë lekë më të ulëta krahasuar me të njëjtën periudhë të vitit 2025.

Raporti bën të ditur gjithashtu se realizimi i të ardhurave nga taksat nacionale ishte 2,4% nën planin e parashikuar për tre muajt e parë të vitit 2026.

Ministria e Financave ka programuar që të ardhurat nga taksat nacionale për gjithë vitin 2026 të arrijnë në rreth 49.5 miliardë lekë.

Ndërkohë, për vitin 2025, të ardhurat nga ky arritën 47 miliardë lekë, çka përkthehet në një rritje prej 5,3% për vitin 2026.

Sipas dokumentit zyrtar, në projektimet për vitin 2026 janë përfshirë disa masa dhe efekte fiskale që pritet të ndikojnë në rritjen e të ardhurave.

Një ndër faktorët kryesorë është efekti nga masat tatimore të lidhura me legjislacionin për lojërat e fatit, nga të cilat parashikohet të arkëtohen rreth 2 miliardë lekë.

Po ashtu, në llogaritjet fiskale është përfshirë edhe efekti i zbatimit të kalendarit për rritjen e taksës së karbonit, e cila në korrik 2026 do të rritet nga 3 lekë/kg në 4.5 lekë/kg.

Sipas përllogaritjeve të Ministrisë së Financave, kjo masë pritet të sjellë gjatë gjashtëmujorit të dytë të vitit 2026 rreth 70 milionë lekë të ardhura shtesë nga taksa e karbonit dhe rreth 14 milionë lekë nga TVSH-ja në import.

Gjithashtu, në parashikimet për të ardhurat është përfshirë edhe efekti nga zbatimi i ligjit të faljes fiskale, nga i cili pritet të arkëtohen rreth 413 milionë lekë.