Urdhëri i Ramës: Drejtorët e burgjeve, të gjithë ushtarakë

Në Asamblenë Kombëtare të PS-së, kreu i qeverisë ndër të tjera foli edhe për drejtorët e rinj të burgjeve. Rama tha se kandidatët me përvojë në Forcat e Armatosura apo me karrierë në strukturat e sigurisë, do të kenë përparësi.

”Kemi vendosur kritere shumë të rrepta dhe ditët në vijim. Ministrja i Drejtësisë do shpallë gjithë drejtuesit e rinj të burgjeve të bazuar në konkursin e organizuar dhe me prioritet të veçantë tek ushtarakët me eksperiencë të suksesshme në Forcat e Armatosura dhe me rol të rëndësishëm organizativ”,-tha Rama.

Rama ju bëri me dije deputetëve të tij se ta harrojnë se mund të emërojnë të njohurit e tyre, pasi për kreun e qeverisë, burgjet nuk kanë degë parti.

”Nuk dua unë ta mbaj tepsinë të gjithën për vete por duam ta çojmë për skrap, pra nuk duam ti marrim nga oborri i LSI-së, ti çojmë tek oborri i PS-së sepse gjendja në burgjet e Shqipërisë, e trashëguar, është një gjë e pabesueshme dhe për këtë arsye një numër i konsiderueshëm drejtuesish dhe punonjësish të burgjeve, jo pak, po afro 130 vetë kanë shkuar për ndjekje penale”,-shtoi Rama.