Vrasja e Agim Arapit në Durrës, i dyshuari dënohet me 3 vite e 4 muaj burg

Gjykata e Apelit të Durrësit, zbret në 3 vite e 4 muaj burg, dënimin për Kujtim Ekonomin, personin e akuzuar për vrasjen e Agim Arapit në prill të vitit 2017.

Ndërsa Gjykata e Shkallës së parë për shkak të gjykimit të shkurtuar e dënoi Ekonomin me 5 vite burg, Apeli vendosi ta ulë më tej atë. Madje, çështja u klasifikua si vrasje nga pakujdesia.

Nga hetimet e kryera rezulton se thika e përdorur për vrasjen e Arapit ka qenë e viktimës dhe jo e të dyshuarit, por se në përleshje është marrë prej Ekonomit.

“E goditëm me grushte, por nuk kishim qëllim ta vrisnim”. Kështu e kanë argumentuar krimin e tyre dy vëllezërit Kostandin dhe Kujtim Ekonomi, të cilët akuzohen se rrahën për vdekje Agim Arapin, në qendër të Durrësit.

Të marrë në pyetje, ata kanë përfshirë edhe bashkëshorten e të ndjerit, e cila sipas tyre, u kishte kërkuar llogari, në prani edhe të njerëzve të tjerë, për paratë që vëllezërit i detyroheshin familjes Arapi.

Autorët e dyshuar të krimit kanë rrëfyer se Agim Arapi sipas tyre i kishte ofenduar për 13 mijë lekët e reja që ata i detyroheshin, në bazë të marrëveshjes që kishin bërë për të kaluar tubat e ajrimit të picerisë nëpërmjet dyqanit të tij.

Në këtë ngjarje të rëndë policia përfshiu fillimisht edhe Jurgen Kurtin, i cili, fillimisht u raportua se ishte protagonist në krim dhe më tej po nga policia u tha se në momentin e ngjarjes ka qenë jashtë dyerve të dyqanit, brenda të cilit vdiq Arapi. Por hetimet lanë të lirë më tej edhe Kostandin Ekonomin.