Artan Myrtaj është vrarë me armë zjarri paraditen e sotme në Sarandë. 44-vjeçari është qëlluar në rrugë dhe ka ndërruar jetë në vendngjarje.
Sipas të dhënave paraprake, autorët dyshohet se kanë qenë dy persona të maskuar me skafandra, të cilët lëviznin me motor në momentin e atentatit. Policia ka nisur hetimet për identifikimin dhe kapjen e tyre.
Myrtaj rezulton të ketë pasur precedent të mëparshëm me drejtësinë. Në vitin 2025, ai ishte arrestuar nga Policia e Sarandës për veprën penale “Përkrahja e autorit të krimit”.
Në atë kohë, 44-vjeçari ishte shpallur në kërkim si një nga personat e dyshuar për përkrahjen e autorëve të një ngjarjeje të ndodhur në Sarandë, ku mbetën të plagosur me armë zjarri Gëzim Hajdaraj dhe Ernest Lamaj.
Ngjarja e vitit 2025 dyshohet se kishte lidhje me një konflikt për një pronë në vijën bregdetare të Sarandës. Për këtë rast, Myrtaj u procedua nga autoritetet për veprën penale të “Përkrahjes së autorit të krimit”.
Ndërkohë, pas vrasjes së sotme, grupi hetimor dhe shërbimet e Policisë kanë nisur mbledhjen e provave në vendngjarje, ndërsa po punohet për zbardhjen e rrethanave dhe identifikimin e autorëve.
Njoftimi i policisë
Sarandë/Informacion paraprak
Rreth orës 09:55, te ish-agjencia, në rrethana ende të paqarta, është vrarë me armë zjarri shtetasi A. M., rreth 44 vjeç, si dhe ka mbetur i plagosur shtetasi Xh. S., rreth 73 vjeç, kalimtar i rastit, i cili është transportuar në spital për ndihmë mjekësore.
Shërbimet e Policisë janë vënë në ndjekje të autorëve. Janë ngritur pika kontrolli në drejtim të Vlorës dhe të Gjirokastrës.
Në vendngjarje ka shkuar grupi hetimor dhe, nën drejtimin e Prokurorisë, vijon puna për sqarimin e rrethanave, administrimin e çdo prove që i shërben hetimit, me qëllim identifikimin dhe kapjen e autorëve.
