Kryetari i bashkisë Himarë, Vangjel Tavo, tha sot zjarri që përfshiu kodrat e qytetit pak ditë më parë shkaktoi dëme në banesa dhe ullinj shumëvjeçarë, ndërsa fatmirësisht nuk pati viktima apo persona të lënduar.
Në një intervistë televizive Tavo tha se zjarri nisi në mbrëmjen e së premtes, rreth orës 19:40, në kodrat mbi lagjen “1 Maji”, në një zonë të mbjellë me ullinj shumëvjeçarë.
“Gjithçka nisi të premten në darkë, rreth orës 19:40, kur zjarri ra në kodrat e qytetit, mbi lagjen ‘1 Maji’, një kodër që është mbjellë me ullinj shumëvjeçarë. Vatra e vogël e flakëve u zgjerua shumë”, u shpreh Tavo.
Sipas tij, në vendngjarje u angazhuan menjëherë shërbimet zjarrfikëse, por terreni i vështirë pengoi ndërhyrjen e menjëhershme në vatrën fillestare.
“Flakët u përhapën shpejt dhe nisën të zbresin drejt lagjes ‘1 Maji’. Në një moment, që përbënte rrezik për jetën e njerëzve, ne bëmë thirrje për evakuim në zonat ku kishte rrezik nga zjarri”, tha Tavo.
Kryebashkiaku theksoi se evakuimi u krye në kohë dhe se prioritet ishte mbrojtja e jetës së banorëve.
“Menjëherë është bërë evakuimi në zonat e rrezikuara. Fatmirësisht nuk kemi pasur jetë të humbura apo njerëz të dëmtuar. Aty kanë qenë të gjitha strukturat për ta menaxhuar situatën”, theksoi Tavo.
Kryebashkiaku Tavo u shreh se “si pasojë e zjarrit u dogjën ullinj shumëvjeçarë, ndërsa pati dëme edhe në banesa. U dogjën gjithsej gjashtë banesa, tre prej të cilave ishin të banuara dhe tre të pabanuara”.
Lidhur me evakuimet, Tavo informoi se bashkia Himarë kishte vënë në dispozicion palestrën e shkollës së mesme të qytetit, ku ishin vendosur edhe shtretër për personat që do të kishin nevojë për strehim të përkohshëm.
“Detyra jonë në këto raste është që të marrim masa për të mbrojtur jetën e qytetarëve. Ne evakuam të parët ata persona që ishin të rrezikuar. Ka pasur edhe persona që nuk kanë dashur të lëvizin nga shtëpitë, por kjo gjë ka qenë e nevojshme”, u shpreh Tavo.
Ai vlerësoi gjithashtu angazhimin e qytetarëve në përballimin e situatës, duke thënë se banorë të zonës u përfshinë në aksionet e evakuimit dhe në ndërhyrje të ndryshme.
“Detyra jonë në këto raste është që të marrim masa për të mbrojtur jetën e qytetarëve. Ne evakuam të parët, ata persona që ishin të rrezikuar. Ka pasur edhe persona, që nuk kanë dashur të lëvizin nga shtëpitë, por se kjo gjë ka qenë e nevojshme. Ka pasur edhe qytetarë që janë angazhuar, duke na ndihmuar në evakuim dhe në aksione të caktuara. Vërtetë u dëmtuan prona, por se u mbrojtën jetët e qytetarëve”, theksoi ai.
Kryebashkiaku Tavi bëri të ditur se “vetëm 12-13 turistë janë evakuuar. I kemi dërguar në vende të sigurta. Ne bëmë gati palestrën e shkollës së mesme të Himarës, me shtretër, që të jenë në gatishmëri. Por se nuk kanë preferuar këtë zgjidhje të bashkisë, por se janë evakuuar tek të afërmit e tyre”.
Në lidhje me dëmet, Tavo deklaroi se dëmet do të dëmshpërblehen, ndërsa ullinjtë e djegur do të rimbillen në të njëjtat zona.
Zjarri me përmasa të mëdha përfshiu Himarën më 4 shtator, duke prekur kodrat e qytetit. Nga flakët u shkrumbuan gjashtë banesa, ndërsa nuk pati viktima apo persona të lënduar.
/k.s/a.f/
ATSH