Zjarri në Himarë, Lamallari në terren: 21 mjete dhe 50 efektivë të angazhuar në operacion

Ministri i Brendshëm, Besfort Lamallari, ka mbërritur në Himarë, ku prej rreth 12 orësh vijojnë përpjekjet për shuarjen e zjarrit dhe vënien nën kontroll të situatës.

Lamallari, i shoqëruar nga drejtori i Shërbimit për Mbrojtjen nga Zjarri, Ervis Gjoshi, ka inspektuar nga afër operacionin dhe ka marrë informacion mbi ndërhyrjen e strukturave në terren.

Gjoshi bëri të ditur se shërbimi zjarrfikës ka angazhuar 21 automjete nga bashki të ndryshme të vendit, ndërsa në operacion marrin pjesë rreth 50 efektivë.

“Automjetet janë angazhuar nga Tirana, Durrësi, Vlora, Himara, Saranda dhe bashki të tjera. Janë përfshirë edhe 50 efektivë për përballimin e kësaj situate. Nga ana jonë është ndërhyrë në çdo vatër. Aktualisht situata është nën kontroll”, deklaroi Gjoshi.

Ai falënderoi efektivët e angazhuar në operacion për punën dhe përkushtimin e tyre, duke vlerësuar se ndërhyrja e koordinuar ka bërë të mundur stabilizimin e situatës.

Në operacion është përfshirë edhe Policia e Shtetit, e cila ka asistuar në evakuimin e banorëve dhe në menaxhimin e perimetrit të sigurisë përreth zonave të prekura nga flakët.

Një prej punonjësve zjarrfikës të Kamzës, i angazhuar në terren, u ka bërë apel qytetarëve që të tregohen më të kujdesshëm dhe të shmangin veprimet që mund të shkaktojnë zjarre apo situata të pakontrollueshme.

Ndërkohë, efektivët kanë vlerësuar edhe bashkëpunimin e banorëve të Himarës, të cilët iu janë përgjigjur thirrjeve për evakuimin e disa banesave dhe kanë ndihmuar duke sinjalizuar në kohë çdo vatër zjarri të konstatuar në zonat përreth.

Pas ndërhyrjes së forcave zjarrfikëse dhe strukturave të tjera, situata në Himarë raportohet aktualisht nën kontroll, ndërsa vijon monitorimi i zonës për të parandaluar riaktivizimin e vatrave.