BBC: Ushtria irakene futet në Mosul

Forcat irakene kanë hyrë së fundmi në qytetin e Mosulit, por kanë hasur një rezistencë të fuqishme nga ana e ekstremistëve të Shtetit Islamik.

Lajmi është përcjellë nga një gazetar i gjigandit britanik BBC, i cili po qëndron me ushtrinë e Irakut.

Sipas tij, luftëtarët e ISIS po bëjnë përpjekje maksimale për të mos lejuar futjen e ushtarëve irakenë në brendësi të qytetit.

Aktualisht ushtria po avancon në dy fronte, respektivisht nga pjesët lindore dhe jugore të qytetit.

Ata po mbështeten nga Shtetet e Bashkuara përmes bombardimeve ajrore si dhe në terren nga grupimet me militantë kurdë.

Më herët, Kryeministri i vendit, Haider al-Abadi, u bëri thirrje ekstremistëve që të dorëzohen, pasi siç tha ai në rast të kundërt ata i pret vdekja.

Shqetësimi më i madh në këtë operacion delikat vijojnë të mbeten qytetarët, të cilët mund të përdoren si mburoja njerëzore nga luftëtarët e ISIS.

Shumë banorë janë larguar nga zonat ku janë zhvilluar përplasjet e armatosura, por një pjesë e konsiderueshme nuk janë lejuar nga ekstremistët.