Bie papunësia në Francë – Arrin nivelin më të ulët në 1 dekadë

Norma e papunësisë në Francë ra lehtë gjatë tremujorit të parë, duke prekur nivelin më të ulët në 1 dekadë, sipas të dhënave zyrtare, që i japin mbështetje presidentit Emmanuel Macron. Zyra e Statistikave INSEE, deklaroi se norma e papunësisë ra në 8.7% nga 8.8% që ishte në tremujorin e katërt 2018.  Ky është edhe niveli më i ulët që prej fillimit të 2009-ës.

Përmirësimi i qëndrueshëm i tregut të punës i ofron Macron pak lehtësim, pas disa muajve të protestave kundër kostove të larta të jetesës dhe reformat ekonomike pro-biznesit. Macron u përpoq në muajt e parë të detyrës për të trajtuar punësimin, duke ndryshuar kodin e punës për të bërë punësimin dhe pushimin nga puna më të thjeshtë.

Pavarësisht se rritja e Produktit të Brendshëm Bruto ka qenë e ulët në vitin e kaluar, ekonomia vazhdon të shtojë mijëra vende të reja pune, duke e çuar normën e punësimit në nivelin më të lartë që prej vitit 1980.