FED ul përsëri interesat – Politikëbërësit të ndarë. Trump: Duhet të kishte vepruar më shpejt!

Rezerva Federale në SHBA uli përsëri normën e interesit me 25 pikë bazë, duke përmendur rreziqe dhe pasiguri nga lufta tregtare dhe ngadalësimi ekonomik botëror.

Lëvizja vjen pas uljes së interesave në Korrik, që ishte hera e parë në 1 dekadë. Komisioni Federal i Tregut të Hapur lajmëroi uljen e interesave në një segment prej 1.75-2%, pas përfundimit të takimit 2-ditorë të politikave monetare.

Pavarësisht tregut të fortë të punës dhe rritjes së shpenzimeve konsumatore, investimet e bizneseve dhe eksportet janë ngadalësuar, sipas bankës qendrore. Inflacioni ndodhet gjithashtu poshtë nivelit objektiv të institucionit.

Tre nga dhjetë anëtarët e komisionit të politikave monetare votuan kundër uljes së interesave me 0.25%, duke vënë në dukje ndasitë e politikëbërësve. Presidenti Donald Trump kritikoi përsëri bankën qendrore menjëherë pas vendimit, duke shkruajtur në Twitter se “Jerome Powell dhe Rezerva Federale dështuan përsëri”.

“Pa guxim, pa kuptim, pa vizion. Një komunikues i tmerrshëm”, shkroi presidenti pasi priste një ulje më të madhe të interesave. Në kundërpërgjigje të komenteve të Trump, Powell rikonfirmoi nevojën për pavarësinë e bankës qendrore. Shtatë nga 17 zyrtarët e Rezervës Federale presin një ulje tjetër të interesave këtë vit.