Oliver Hart dhe Bengt Holmstrom marrin Nobelin në Ekonomi

Ekonomistët Oliver Hart dhe Bengt Homstrom kanë fituar Çmimin Nobel për Ekonomi për këtë vit, për kontributin e tyre për “teorinë e kontratës”

Juria e Akademisë Mbretërore të Suedisë për Shkencë, ka thënë sot se puna e dy ekonomistëve “paraqet një themel për hartimin e politikave dhe institucioneve në shumë fusha, përfshirë falimentimin dhe kushtetutat politike”.

Hart dhe Homstrom kanë analizuar gjëra të tilla si pagat e bazuara në performancë për drejtuesit më të lartë dhe aktivitetet në procesin e privatizimit në sektorin publik.

Ky çmim është i vetmi që nuk jepet sipas testamentit të industrialistit suedez, Alfred Nobel dhe është ndarë për herë të parë në vitin 1969.

Vitin e kaluar fitues i Çmimit Nobel për Ekonomi ishte ekonomisti Angus Deaton. Ai u shpërblye për punën e tij në ekplorimin e konsumit, varfërisë dhe mirëqenies

Çmimi Nobel për mjekësi, fizikë, kimi dhe paqe është ndarë javën e kaluar.

Ndërkaq ai për letërsi do të ndahet më 13 tetor./REL/