”Masa e sigurisë të ishte më e ashpër”, Spahiu: Vlora Hyseni si kryespiune grua ka tradhtuar Shqipërinë

Juristi Kreshnik Spahiu flet për ish-drejtueses e SHISH, Vlora Hyseni, e cila dyshohet për bashkëpunim me Ergys Agasin, të arrestuar më herët në dosjen e AKSHI-t.

Spahiu tha se masa e sigurisë ndaj Hysenit duhej të ishte më e rëndë se “arresti në shtëpi”, ndërsa kritikoi edhe përplasjet e saj me gazetaren Klodiana Lala. Sipas tij, mënyra e komunikimit të Hysenit ka qenë jo profesionale dhe akuzat ndaj gazetares për bashkëpunim me shërbimin serb përbëjnë “një shantazh të hapur”.

“Një grua që duhet të përfaqësojë një institucion me dinjitet, sulmon një grua tjetër, gazetare, në ditën më të zezë të saj, duke e akuzuar për bashkëpunim me shërbimin serb. Është tërësisht jo profesionale, jo ligjore dhe një shantazh i hapur”, tha Spahiu. Ai e cilësoi situatën veçanërisht serioze për shkak të funksionit që Hyseni ka mbajtur në krye të SHISH.

“Vlora Hyseni nuk ka tradhtuar shtëpinë e vet, por Shqipërinë”, u shpreh Spahiu, duke shtuar se ajo duhet të kishte bërë një kërkim faljeje publike. Në fund, juristi vlerësoi veprimet e SPAK, duke thënë se institucioni është treguar profesional duke e pezulluar Hysenin nga detyra dhe duke vendosur masën e arrestit në shtëpi.