Presidenti kroat, Milanović kritik me liderët perëndimorë: Macron dhe Starmer pa qartësi

Presidenti i Kroacisë, Zoran Milanović deklaroi gjatë samitit të NATO-s në Ankara, se vendi i tij do të vazhdojë të ndjekë një politikë të kujdesshme, duke mbajtur qëndrim besnik ndaj aleatëve, por pa u përfshirë në iniciativa që, sipas tij, mund të sjellin rreziqe.

Duke komentuar rolin e liderëve ndërkombëtarë, Milanović tha se Donald Trump, sipas tij, është më i drejtpërdrejtë në qasjen e tij, pasi “vjen si një tregtar armësh i vendosur dhe përfaqëson interesa të caktuara”. Ai shtoi se Trump ka një qasje respekti ndaj liderëve si Vladimir Putin dhe Xi Jinping, ndërsa liderët e tjerë përdorin një retorikë më të ndryshme.

Milanović theksoi se Kroacia nuk është pjesë e të ashtuquajturit “Koalicioni i të Vullnetshmëve” për Ukrainën dhe se Zagrebi nuk dëshiron të marrë pjesë në veprime ku nuk ka interes të drejtpërdrejtë. “Kroacia ka paguar shpesh faturat e të tjerëve gjatë historisë dhe ndonjëherë ka bërë llogaritje të gabuara për veten. Tani duhet të përfitojmë nga pozicioni ynë i mirë dhe të mos jemi aty ku nuk kemi nevojë të jemi”, u shpreh presidenti kroat.

Ai tha se ideja e një pranie perëndimore në Ukrainë, e përmendur nga presidenti francez Emmanuel Macron dhe kryeministri britanik Keir Starmer, mbetet e paqartë dhe mund të jetë e rrezikshme. Milanović paralajmëroi gjithashtu për nevojën që NATO të marrë seriozisht zhvillimet ushtarake në rajon, duke përmendur rritjen e kapaciteteve të armatimit dhe nevojën që aleanca të përgatitet për sfida të reja të sigurisë.