Republikanë të njohur kundër Trumpit për mënyrën e menaxhimit të fushatës

Republikanë të njohur amerikanë, përfshirë kryetarin e partisë, Reince Priebus, ish-kryetarin e bashkisë së Nju Jorkut, Rudy Giuliani dhe ish-kryetarin e Dhomës së Përfaqësuesve, Newt Gingrich kërkojnë të ndërhyjnë te kandidati i tyre për president, Donald Trump për ta këshilluar për ndryshimin e strategjisë së fushatës së tij elektorale, njoftoi rrjeti informativ amerikan, NBC News.

Gingrich, i cili ka qenë edhe në listën e Trumpit për zëvendëspresident, është mes atyre që i kërkojnë atij të rikalibrojë fushatën elektorale.

“Trump po ndihmon atë (Clinton – shën. i përkth.) për të fituar duke provuar se është më i papranueshëm sesa ajo”, deklaroi Gingrich për gazetën amerikane ”The Washington Post”.

Megjithatë, Paul Manafort, drejtuesi i fushatës së Trumpit, hedh poshtë pretendimet se fushata ishte në një pështjellim të plotë. “Kandidati ka kontrollin mbi fushatën”, deklaroi Manafort për rrjetin informativ ”Fox News”.