Shkolla përfshihet nga flakët, 23 fëmijë të vdekur në Liberi

Të paktën 23 fëmijë raportohet se kanë vdekur pasi një shkollë me konvikt u përfshi nga flakët në periferi të kryeqytetit të Liberisë, Monrovia.

Zjarri besohet se shpërtheu në orët e para të mëngjesit kur nxënësit po flinin në një ndërtesë ngjitur me një xhami.

Policia tha për BBC se janë ende në kërkim të kufomave nën rrënojat e ndërtesës.

Presidenti George Weah në një postim në Twitter shprehu ngushëllimet për familje e prekura nga kjo tragjedi.

“Lutjet e mia shkojnë për familjet e fëmijëve që vdiqën mbrëmjen e kaluar në qytetin Paynesville, si rezultat i një zjarri vdekjeprurës që përfshiu ndërtesën e shkollës së tyre. Kjo është një kohë e vështirë për familjet e viktimave dhe të gjithë Liberinë,”-tha ai.