Trump ndalon Ukrainën të përdorë raketat amerikane kundër Rusisë

Sipas një raporti të Wall Street Journal, Shtetet e Bashkuara kanë bllokuar që nga pranvera e vonë përdorimin nga Ukraina të raketave amerikane me rreze të gjatë veprimi për goditje brenda territorit rus. Ky vendim është pjesë e një përpjekjeje të administratës Trump për të nxitur presidentin rus Vladimir Putin të hyjë në bisedime paqeje.

Burime pranë Pentagonit kanë bërë të ditur se përdorimi i sistemit raketor Atacms është i ndaluar. Të paktën një herë, Ukraina ka kërkuar leje për t’i përdorur ndaj një objektivi, por kërkesa është refuzuar në bazë të një “mekanizmi rishikimi” të hartuar nga Elbridge Colby, nënsekretar i Pentagonit për politikën. Ky mekanizëm përcakton mënyrën e përdorimit të armëve amerikane me rreze të gjatë ose të dhëna nga aleatët evropianë, që varen nga inteligjenca dhe teknologjia amerikane.

I njëjti proces zbatohet edhe për raketat britanike Storm Shadow, pasi ato përdorin të dhëna të shënjestrimit nga SHBA, kanë konfirmuar zyrtarë amerikanë dhe britanikë. Vendimin final për përdorimin e raketave Atacms, me rreze veprimi rreth 305 km, e merr sekretari amerikan i mbrojtjes, Pete Hegseth.

Administrata Biden kishte lejuar më herët përdorimin e këtyre raketave kundër objektivave rusë në nëntor, pas përfshirjes së trupave koreano-veriore në luftë. Megjithatë, para inaugurimit, Trump e kritikoi hapur këtë vendim, duke e cilësuar si një gabim që vetëm “përshkallëzon luftën”.

“Unë nuk jam aspak dakord me dërgimin e raketave qindra milje brenda Rusisë. Pse po e bëjmë këtë? Vetëm po e përkeqësojmë situatën,” deklaroi Trump për Time Magazine.

Ende nuk është e qartë nëse ky mekanizëm i ri përbën një ndryshim të plotë të politikës amerikane, por ai vjen në një kohë kur SHBA po ushtron kontroll gjithnjë e më të madh mbi furnizimin e armëve për Ukrainën, për shkak edhe të shterimit të rezervave të veta.

Zëdhënësja e Shtëpisë së Bardhë, Karoline Leavitt, theksoi se qëndrimi i Trump mbetet i pandryshuar: “Ai ka qenë shumë i qartë se lufta në Ukrainë duhet të përfundojë.”

Megjithatë, në një deklaratë të fundit, Trump pranoi se pa mundësinë e sulmeve, Ukraina e ka të pamundur të fitojë. “Është si një skuadër sportive me mbrojtje të shkëlqyer, por që nuk lejohet të sulmojë. Nuk ka shanse për të fituar,” shkroi ai.

Muajin e kaluar, SHBA ra dakord të furnizojë Ukrainën me sisteme të reja armatimi vetëm nëse kostot mbulohen nga vendet evropiane. Paralelisht, administrata miratoi shitjen e 3,350 raketave ajrore Erams me rreze 400 km, ndërsa Trump ka theksuar se SHBA “nuk synon” t’i japë Kievit armë me rreze të gjatë që mund të godasin drejtpërdrejt Moskën.