Kreu i Agjencisë së Mbikëqyrjes Policore, Klevis Qose, ka zhvilluar një takim me ambasadorin e Prezencës së OSBE-së në Shqipëri, Michel Tarran, ku në fokus ishte vijimi i bashkëpunimit në fushën e mbikëqyrjes policore.
Lajmin e ka bërë të ditur vetë Qose përmes një reagimi, ku shpreh mirënjohjen për mbështetjen e dhënë nga OSBE-ja gjatë periudhës kur ai drejtonte Sistemin Penitenciar. Gjatë takimit, Qose ka vlerësuar gjithashtu gatishmërinë e ambasadorit Tarran për të vijuar bashkëpunimin me Agjencinë e Mbikëqyrjes Policore, me synim forcimin e kapaciteteve institucionale dhe shkëmbimin e praktikave më të mira.
“Bashkëpunimi i vazhdueshëm dhe shkëmbimi i praktikave më të mira mbeten thelbësore për forcimin e kapaciteteve institucionale dhe avancimin e agjendës sonë të përbashkët”, thekson Qose në reagimin e tij. Takimi vjen në kuadër të bashkëpunimit me partnerët ndërkombëtarë për zhvillimin e mëtejshëm të mekanizmave të mbikëqyrjes policore dhe forcimin e kapaciteteve të institucioneve përgjegjëse.