Dy ekipe të Njësia Speciale RENEA përfaqësuan me profesionalizëm Policinë e Shtetit dhe Shqipërinë në garën ndërkombëtare “SWAT Challenge Dubai 2026”, duke treguar përkushtim dhe aftësi të larta operacionale deri në ditën e fundit të aktivitetit.
Pjesëmarrja e njësive shqiptare të RENEA-s tërhoqi vëmendjen e homologëve ndërkombëtarë dhe nxiti diskutime për bashkëpunim në fushën e trajnimeve dhe shkëmbimit të përvojave. Gjatë aktivitetit, Zëvendëspresidenti dhe Kryeministri i Emirateve të Bashkuara Arabe, Mohammed bin Rashid Al Maktoum, si dhe Komandanti i Përgjithshëm i Policisë së Dubait, Abdullah Khalifa Al Marri, falënderuan efektivët për profesionalizmin e treguar.
Në përfundim të garës, autoritetet e Dubait shprehën interes për nisjen e një procesi bashkëpunimi zyrtar me RENEA-n, në drejtim të trajnimeve dhe shkëmbimit të praktikave më të mira operative. Përfaqësuesit shqiptarë garantuan se kërkesa do t’i përcillet Drejtorit të Përgjithshëm të Policisë së Shtetit, Ilir Proda, për shqyrtim dhe miratim.
Pjesëmarrja në këtë sfidë jo vetëm rriti kapacitetet profesionale të njësive speciale, por forcoi edhe marrëdhëniet ndërkombëtare të Policisë së Shtetit, duke konfirmuar standardet e larta të RENEA-s në përballjen me sfida komplekse të sigurisë dhe luftën kundër krimit dhe terrorizmit.
