Nga Albert Vataj
E ku tjetër, përveçse në Shkodër, mund të merrnin një kuptim kaq të natyrshëm bashkë “Moto Fest”, muzika rock dhe adrenalina e lirisë?!
Për dy ditë me radhë, qyteti i traditës, kulturës dhe ritmit bohem u shndërrua në kryeqytetin shqiptar të motorëve, ku gjëmimi i “Harley”-ve, tingujt e kitarave elektrike dhe energjia e një feste të pazakontë elektrizuan rrugët, sheshet dhe mbrëmjet e Shkodrës.
Qindra motoristë nga Shqipëria, Kosova, Maqedonia e Veriut dhe diaspora mbërritën në qytetin veriperëndimor jo vetëm për të ekspozuar motorët e tyre, por për të ndarë një pasion që lidhet me rrugën, lirinë, shpejtësinë dhe shpirtin rebel që muzika rock e ka shndërruar prej dekadash në mënyrë jetese.
Shkodra, me shpirtin e saj artistik dhe temperamentin që di të festojë, u bë skena ideale e këtij bashkimi emocionesh. Në çdo cep të qytetit ndiheshe ritmi i motorëve dhe pulsimi i një atmosfere që nuk ishte thjesht aktivitet festiv, por një manifestim i energjisë urbane dhe i kulturës së rrugës.
“Moto Fest” solli muzikë live, parada spektakolare, performanca dhe aktivitete që tërhoqën vëmendjen e qytetarëve dhe vizitorëve të shumtë, duke e kthyer fundjavën në një kremte të zhurmshme, por plot jetë. Tingujt rock u përzien me aromën e asfaltit dhe kromit të motorëve, ndërsa qyteti jetoi në ritmin e një aventure kolektive.
Parada e motorëve ishte një nga kulmet e këtij organizimi madhështor. Mbi 500 motoristë marshuan nëpër rrugët e Shkodrës, në një prej eventeve më të mëdha të këtij lloji të organizuar ndonjëherë në qytet. Një lumë motorësh, dritash, flamujsh dhe entuziazmi përshkoi arteriet kryesore, duke zgjuar kureshtjen dhe admirimin e qytetarëve që kishin dalë për të përjetuar nga afër këtë spektakël të rrallë.
Në krye të paradës ishte kryebashkiaku Benet Beci, i cili iu bashkua motoristëve të ardhur nga trojet shqiptare dhe diaspora, duke i dhënë aktivitetit edhe dimensionin simbolik të një feste që bashkon komunitete, pasione dhe kultura.
Të ardhur nga vende të ndryshme të botës, motoristët sollën me vete jo vetëm motorët e tyre imponues, por edhe historitë, përvojat dhe frymën e një komuniteti ndërkombëtar që e sheh rrugën si horizont dhe udhëtimin si mënyrë për të jetuar.
Energjia, muzika rock dhe adrenalina pushtuan Shkodrën deri në orët e vona të natës. Qyteti dukej sikur merrte frymë ndryshe, i zhytur në dritë, tinguj dhe emocione që e kthyen “Moto Fest” në një spektakël të vërtetë urban. Në zemër të qytetit, mes motorëve që shkëlqenin nën dritat e mbrëmjes dhe tingujve të fuqishëm të rock-ut, Shkodra dëshmoi edhe një herë se di të jetë mikpritëse, festive dhe magjepsëse.
Sepse Shkodra nuk është vetëm qytet historie dhe tradite; ajo di të bëhet edhe qytet ritmi, pasioni dhe lirie. Dhe “Moto Fest” ishte prova më e bukur e këtij shpirti që nuk resht së jetuari me intensitet.
