I ftuar në emisionin ”Koha Jonë-Debat”, kreu i Partisë ”Mundësia”, Agron Shehaj foli për objektivat politike të forcës që drejton dhe pritshmëritë për zgjedhjet e vitit 2029. Përballë Nikoll Lesit, ai u ndal te rrugëtimi i partisë, duke thënë se projekti politik është ndërtuar nga zero dhe se brenda dy viteve arriti të sigurojë përfaqësim në Kuvend me dy deputetë.
”Ne krijuam një projekt politik nga zero dhe brenda 2 viteve arritëm që të jemi në Parlament me 2 deputetë. Në Tiranë morëm 6% të votave dhe në total 3%”, deklaroi Shehaj, ndërsa shtoi se sipas sondazheve të fundit mbështetja për partinë është dyfishuar. I pyetur nga Lesi nëse synimi i tij është që në zgjedhjet e ardhshme të sigurojë të paktën 10 mandate për t’u bërë faktor qeverisës, Shehaj tha se rritja kërkon kohë dhe punë të vazhdueshme.
Lesi: Ju keni 2 deputetë në Kuvend, dhe në zgjedhjet e ardhshme në 2029, çfarë synimi ke? Sepse duhet të marrësh të pakën 10 deputetë që të jesh faktor qeveribërës, sepse është e vështirë, paçka pasionit që ti e tregon! Ka një shpresë që mund të eci partia jote.
Shehaj: Ne kemi krijuar një projekt politik nga zero dhe brenda 2 viteve arritëm që të jemi në Parlament me 2 deputetë. Në Tiranë morën 6% të votave, dhe në total 3%. Në sondazhet që kemi bërë kohët e fundit, mbështetja është dyfishuar. Se çfarë do të ndodhi pas 3 viteve ne nuk e dimë. Por unë di një gjë, nëse do të rritesh, duhet të punosh. Nuk ka asnjë ndryshim që vjen brenda ditës dhe e kuptoj që ka shumë që shprehen: Pse ne Agronin do presim?
Lesi: Njerëzit presin ndryshim!
Shehaj: Atëherë njerëzit duhet të përqafojnë ndryshimin dhe të mos presin, sepse e kanë mundësinë.
Lesi: Po nuk je vetëm ti ndryshimi, unë e thash që ka edhe emra të tjerë. Se do dalin edhe parti të reja, se dëgjova këto ditë që po zien kazani.
Shehaj: Po le të daln, dhe ata që duan ndryshimin, nuk duhet të thonë që ”Ti Agron kthehu te PD”, sepse ky nuk është ndryshim. Tani edhe duan ndryshim, edhe duan që të kthehem tek Berisha. /Koha Jonë/