Kenan Yildiz po përjeton një sezon në ngritje te Juventusi, me trajnerin Luciano Spalletti që e ka bërë gjithnjë e më qendror në lojën bardhezi. Performancat e tij kanë rritur interesin për të ardhmen e mesfushorit, ndërsa klubi po mendon për rinovimin e kontratës.
Giorgio Chiellini, para ndeshjes ndaj Bolonjës, theksoi se momentalisht nuk ka urgjencë, por të gjithë janë të vetëdijshëm për nevojën për ta përshtatur kontratën sipas statusit të lojtarit: “Kenan është i rëndësishëm dhe ka një kontratë të gjatë. Kur të vijë koha e duhur, synojmë ta rinovojmë dhe të rrisim pagën e tij.”
Babai i Yildiz, Engin, ndodhet aktualisht në Torino, ndërsa agjenti i tij, Jorge Mendes, po përgatit strategjinë për negociatat. Aktualisht mesfushori fiton 1.5 milionë euro në sezon, por objektivi i klubit është ta afrojnë te grupi i më të paguarve, rreth 6 milionë euro në sezon.
Sipas mediave italiane, para Krishtlindjes pritet një takim i ri mes palëve, ku do të diskutohet jo vetëm çështja ekonomike, por edhe ambicia e Juventusit për t’u rikthyer te titujt, ndërsa Yildiz mbetet në radar të klubeve si Liverpool, Real Madrid dhe Chelsea.