I famshi Maks Velo po jetëzohet në një projekt të cilin ai e kishte pasion. Sot kryebashkiaku Tiranës, Erion Veliaj ka postuar videon nga punimet dhe një shënim: “Shumë shpejt i rikthejmë qytetarëve një godinë ikonike të Tiranës, si 7-Katëshi te Bulevardi “Zogu I”, e cila për vite me radhë zihej nga partitë e vogla për zyra.
Ajo po rivjen sipas projektit të të madhit Maks Velo, në një ndërtesë shërbimesh për Njësinë 9 dhe Bashkinë e Tiranës”- përfundon Veliaj.
*Maks Velo lindi në Paris, më 31 gusht të vitit 1935. Pas lindjes së tij, familja Velo u kthye përsëri në Shqipëri, në qytetin e Korçës, ku Maksi ka kaluar edhe fëmijërinë. Vendi i origjinës së prindërve ishte Dardha. Pasi mbaron gjimnazin, ai vazhdon studimet pranë Institutit Politeknik, në degën e Inxhinierisë së Ndërtimit. Më pas specializohet për arkitekturë dhe në vitin 1960 merr pjesë në projektimin e parë që u bë në Tiranë. Ka punuar më tej pranë byrosë së projektimit të Tiranës. Pastaj, vitet ’78-’79 përkojnë edhe me periudhën më të vështirë të jetës së tij, pasi gjatë kësaj kohe, ai arrestohet dhe dënohet me dhjetë vjet burg. Maks Velo është autor i një sërë botimesh si: “Kokëqethja”, “Palltoja e burgut”, “Thesi i burgut”, “Paralele për arkitekturën”, “Kohë antishenjë”, “Jeta ime në figura ” etj. Si artist, ai krijoi në disa gjini të artit: pikturë, prozë, poezi, publicistikë sikundër ishte i angazhuar në çështje të aktualitetit shqiptar. U nda nga jeta në Tiranë në 7 maj 2020.
