Deklaratë e fortë e babait të Ervis Martinaj: “Ua kam dhënë koordinatat e sakta dhe emrat se kush e vrau”

Babai i Ervisit Martinajt, Mustafa Martinaj është paraqitur për herë të dytë në Gjykatën e Posaçme Kundër Korrupsionit dhe Krimit të Organizuar, në procesin për pronat e djalit të tij.

Seanca është shtyrë sërish për shkak të mungesës së dy avokatëve, por pas seancës Mustafa Martinaj ka deklaruar se nuk ka asnjë lëvizje nga autoritetet sa i përket zbardhjes së ngjarjes së zhdukjes së djalit të tij, Ervis Martinaj.

“Nuk duan ta zbardhin, prandaj e lënë në Kurbin, pasi ua kam dhënë koordinatat e sakta dhe emra konkretë”, është shprehur ai.

Sipas tij, në moszbardhjen e ngjarjes janë të përfshirë edhe drejtues të policisë kriminale gjatë viteve të fundit.

“I kam thënë të gjitha në SPAK kur erdha dëshmova me kërkesën time, askush nuk është interesuar që atëherë”, tha babai i Ervisit, Mustafa Martinaj.

Kjo që deklaron babai i Ervis Martinajt dhe drejtësia e policia heshtin është e padrejtë, në mos kriminale. Sepse nëse ai thotë për emra konkretë se kush e organizoi vrasjen, dhe nuk arrestohen nga prokuroria, atëhere diçka fshihet. Kjo i lë udhë gjakmarrjes në mënyra të egra veriore.

Dosja duhet që nga Prokuroria e Krujës të shkojë në SPAK, ndryshe është dikush me shumë ndikim që nuk deshiron të zbardhet vrasja.