Enver Robelli: Emërimi i Adi Krastës si zëvendësdrejtor i RTK-së është një lajm i mirë

Nga Enver Robelli-

Besoj se emërimi i Adi Krastës në funksionin e zëvendësdrejtorit të RTK-së është një lajm i mirë për shumë arsye.

RTK hap dyert për një publicist, moderator e menaxher medial që është sinonim i njëjtësimit me ekranin televiziv; cilësitë e tij profesionale janë të padiskutueshme.

Emërimi është po ashtu një sinjal i mirë që vjen nga Kosova mbi zgjerimin medial të albanosferës.

Për RTK-në, e cila prej vitesh ka qenë e mbyllur dhe shpesh e përdorur nga pushtetet qoftë si punëdhënës, qoftë si instrument për interesa politike partiake, emërimi i Krastës, si aktor i jashtëm, ndoshta mund të ndihmojë në zgjerimin e fokusit dhe rrëzimin e pengesave provinciale.

Le ta marrim si shembull raportin Gjermani-Zvicër dhe shkëmbimet mediale mes dy vendeve: Gjermania i ka 83 milionë banorë, Zvicra 8,7.

Megjithatë, Gjermania e madhe shpesh ka peshkuar gazetarë në Zvicër:

Kryeredaktorja e gazetës së madhe gjermane “Süddeutsche Zeitung” është zvicerane (zëvendëskryeredaktorja është austriake).

Kryeredaktor i së përjavshmes së famshme gjermane “Die Zeit” ka qenë një publicist gjerman. I njëjti pastaj ka drejtuar televizionin publik të Zvicrës.

Kryeredaktor i së përditshmes gjermane “Die Welt” ka qenë një zviceran.

Drejtor i televizionit gjermane 3Sat ka qenë një publicist dhe menaxher medial nga Zürich.

Një publiciste zvicerane ka qenë drejtore e programit të televizionit publik gjerman MDR. E njëjta tani është drejtore e televizionit publik të Zvicrës SRF.

Rrjedhimisht, emërimi i Adi Krastës duket si një zhvillim normal brenda albanosferës, kur dihet se dallimet mes Kosovës e Shqipërisë janë shumë më të vogla se ato mes Zvicrës, Gjermanisë dhe Austrisë.