Këtë mbrëmje i ftuar në ”Koha Jonë-Debat” është kreu i Partisë Mundësia, deputeti Agron Shehaj. Përballë Nikoll Lesit, ai u shpreh se nuk ka pasur zgjidhje tjetër, përpos që të jetë kundër Berishës dhe Ramës. Gjatë debatit, Lesi ngriti pyetjen pse partitë e reja nuk u bashkuan në zgjedhjet e vitit 2025, dhe që, sipas tij, ato duhet të krijojnë koalicion. Lesi përmendi Adriatik Lapaj dhe Arlind Qori, ndërsa Shehaj u përgjigj se mungonin kushtet për një bashkim të tillë.
Sipas Shehajt, zgjedhjet e vitit 2025 shënuan një ndryshim të madh politik, pasi për herë të parë mbi 150 mijë qytetarë votuan për parti të reja. “Votuesit ndoshta do ta donin bashkimin, por nuk ishte e thënë të ndodhte kështu. Adriatik Lapaj dhe Endri Shabani bënë koalicion dhe përfunduan në një situatë të ngatërruar. Kjo na bind edhe më shumë pse nuk duhet të hynim në koalicion”, u shpreh Shehaj.
Lesi: Ju jeni parti e parë, në këto 3 partitë e reja. Nuk gjeni një formulë bashkimi, konsensusi, bashkimi në sytë e votuesit? Sepse kam dëgjuar edhe gjatë fushatës, që pse nuk bashkohet Shehaj me Lapajn dhe me Qorin. Si përçahen, kur ne kemi shpresë për të tre? E gjithë shpresa e njerëzve ishte tek partitë e reja.
Shehaj: Në 2025 ndodhi një ndryshim shumë i madh. Për herë të parë, u votuan partitë e reja. Mbi 150 mijë votues, votuan për një parti të re. Nuk kishte ndodhur kurrë më parë. Gjithmonë ka pasur parti të vogla që nuk e bindnin elektoratin. Ose janë shtypur nga dy partitë e mëdha.
Ky është fakt, në 2025. Unë e di që votuesit do ta donin bashkë, por nuk është e thënë të jetë kështu dhe shyqyr Zotit nuk ndodhi kjo gjë. Sepse përgjatë fushatës, Adriatik Lapaj që bëri koalicionin me Endri Shabanin, na u lutun edhe neve që të bashkoheshim, që të mos shkonin votat dëm.
Në atë kohë nuk ekzistonin kushtet dhe vazhdojnë të mos i kemi. Atë që bëri Lapaj dhe Shabani, është për të dalë në konkluzionin për të mos me dalë në koalicion. Ata bënë koalicionin dhe u bënë lëmsh, dërguan tezen në Kuvend. /Koha Jonë/