Blendi Klosi në ”Koha Jonë-Debat”: Postimi i Spiropalit nuk më pëlqeu, por s’ka qasje për grupime në PS

Blendi Klosi, Sekretari i Përgjithshëm i PS-së, është i ftuari sonte në “KOHA JONE-DEBAT” me Nikoll Lesin. Ndërkohë, në selinë rozë situata duket larg qetësisë, pasi ish-ministrja e Jashtme, Elisa Spiropali ka dalë hapur me qëndrime kritike, ndërsa përplasjet e saj me kryeministrin Edi Rama në mbledhjet me dyer të mbyllura janë kthyer tashmë në një nga temat më të komentuara të politikës së ditës. Për këtë situatë Klosi tha se qëndrimi i Spiropalit është një qëndrim momental, por e pranon që postimi i fundit në Facebook nuk i ka pëlqyer.

Klosi: Është një status momental.

Lesi: Emocional?

Klosi: Momental. Elisa ka qenë një nga personazhet e rëndësishëm, një nga drejtueset më të larta të PS-së, drejtuese qarku, anëtare kryesie, ministre, kryetare Kuvendi, ministre e Jashtme. Pra ka pasur të gjithë vlerësim e mundshëm brenda forumeve tona. Statusin nuk mund të them që më pëlqeu, por besoj që është një status emocional, i cili kërkon që të analizohet. Nuk mendoj që ai status përbën një rrymë në PS, apo dhe kërkon që të çajë PS përpara zgjedhjeve të rradhës.

Lesi: A ka një konçidencë me këto debatet publike të Erion Braçes apo ky është më brenda stanit të partisë, është më i kujdesshëm. Pra Spiropali dhe Braçe po krijojnë një grup?

Klosi: Erion Braçe vazhdon të bëjë atë që ka bërë Erion Braçe në 30 vite në Parlamentin shqiptar, 35 vite në politikën shqiptare që të kritikojë dhe e bën shumë mirë atë pjesë. Padyshim që dorën nuk e mban, i bie majtas dhe djathtas. Ka qenë dhe është një folës i jashtëzakonshëm në Parlament, kritikues, opinionist, ngreh probleme, shqetësime dhe nuk mendoj që PS i vjen gjë e keqe nga kritikat e Braçes. Nuk më ka shkuar mendja që Spiropali dhe Braçe të krijojnë grupime në PS. Këtë e kam bindje. Nuk ka organizime për grupime në PS.

Ndiqni videon për me tepër kliko ku shkruhet Watch on Youtube