Ikballe Huduti u shpall ”non-grata”, ministri Lamallari poston videon dhe thotë disa fjalë

Teologia nga Kosova, Ikballe Huduti që shquhej si ithtare e ish-Liderit Suprem të Iranit, Ali Khamenei, dhe e cila protestonte në Tiranë kundër qeverisë Rama u shpall ”non-grata” dhe nuk do të lejohet të futet në Shqipëri për 15 vitet e ardhshme. Ministri i Punëve të Brendshme, Besfort Lamallari bashkangjitur videos ku Huduti flet me superlativa për Khamanein, si dhe për kryeministrin Albin Kurti, shkruan se shpallja e saj person i padëshirueshëm në Shqipëri, nuk do të thotë se qeveria po përndjek protestuesit kundër saj, por masë ndaj “çdo urrejtje nxitës dhe ekstremist”.

Postimi i plotë

Mos merremi me protestuesit?!

Jo! Jo vetëm nuk merremi me asnjë protestues si i tillë, por përpiqemi t’i dëgjojmë të gjithë ata që janë sinqerisht të shqetësuar. Por patjetër që do të merremi me çdo urrejtje nxitës dhe ekstremist, si kjo zonja që bindjet e saja mund t’i mbajë për vete jashtë Shqipërisë të paktën 15 vitet e ardhshme!

Sepse në Shqipërinë vend anëtar i NATO-s dhe së shpejti pjesë e Bashkimit Evropian, nuk ka vend se khameneizmi është baraz me terrorizmin, ekstremizmin, obskurantizmin!

Një turp më vete edhe përzierja e emrit të kryeministrit të nderuar të Kosovës në përroin psiqik të kësaj zëdhënëseje të një shteti të shpallur me konsensus shtet terrorist nga Kuvendi i Shqipërisë.