”Shqipëria e re”, 120 akademikë nga diaspora mbështesin protestën

Mbi 120 akademikë dhe intelektualë shqiptarë të diasporës kanë dalë me një deklaratë mbështetëse për protestat në Shqipëri dhe kërkesën për një “Shqipëri të re”, duke e cilësuar atë një reagim legjitim ndaj gjendjes aktuale politike dhe institucionale.

Ata theksojnë nevojën për qeverisje më transparente dhe më të përgjegjshme, si edhe për institucione që të jenë në shërbim të qytetarëve dhe jo të interesave të pushtetit. Një pjesë e rëndësishme e qëndrimit të tyre lidhet me gjendjen e arsimit dhe shkencës në vend.

Sipas tyre, sistemi aktual përballet me nënfinancim, mungesë meritokracie, dobësim të integritetit akademik dhe ndikime klienteliste, si edhe me mungesë vizioni afatgjatë për zhvillimin e dijes. Ata paralajmërojnë se pa arsim cilësor, kërkim shkencor serioz dhe inovacion, vendi nuk mund të ketë zhvillim të qëndrueshëm apo institucione demokratike funksionale.

Akademikët shprehin gatishmëri për të kontribuar me ekspertizë dhe përvojë në proceset e reformimit, me synimin për ndryshime të thella politike dhe institucionale në vend.