Skandali/ Leli i Vlorës i jep dy muaj në përdorim sheshin publik Partisë Socialiste, në shesh vetëm Rama

Bashkia e Vlorës vihet nën akuzë se i jep në përdorim një partie politike një shesh publik, për dy muaj për qëllime elektorale.

Gjithçka vërtetohet nga një shkresë zyrtare të kryebashkiakut të Vlorës, Dritan Lela e cila mban datën 7 qershor.

Në përgjigjen që kryebashkiaku i Vlorës i ka dhënë Lëvizjes Socialiste për Integrim, bën me dije se sheshi para pallatit të sportit “Flamurtari” nuk është i lirë për takime elektorale, pasi i është dhënë në përdorim një tjetër subjekti politik për dy muaj (Partisë Socialiste).

“Në përgjigje të kërkesës suaj ju sqarojmë se Bashkia Vlorë me shkresën nr. 3314/1 datë 5.05.2017 i ka dhënë leje një subjekti tjetër për përdorim nga data 01.05.2017 deri më datën 30.06.2017 sheshin para Pallatit të Sportit “Flamurtari” Vlorë për qëllime elektorale”, – shkruhet në dokumentin që mban firmën e kryebashkiakut Dritan Leli.

Madje kryebashkiaku sugjeron që të bëjë kërkesë për përdorimin e ndonjë tjetër ambienti në qytetin e Vlorës, siç mund të shihet në shkresën që gjeni bashkëngjitur.

Sipas shkresës në fjalë sheshi i është dhënë në përdorim subjektit politik që më datën 1 maj 2017, një muaj para nisjes së fushatës elektorale.