Seanca në Komisionin Hetimor për inceneratorët u shoqërua me debate mes deputetëve. Në debat, u përfshi po ashtu edhe administratorja e Inceneratorit të Tiranës, Ariola Kodra, e cila ishte thërritur për të dëshmuar.
Gjatë marrjes në pyetje, kryetarja e Komisionit, Jorida Tabaku i tërhoqi vëmendje Kodrës. ”E kuptoj që është e rëndësishme të komunikosh me mesazhe, po pret përgjigje nga Mirel Mërtiri, Klodian Zoto, apo Stela Gugalljan, por kini mendjen”.
Deputeti i PS-së, Arben Pëllumbi tha ”Ju keni qenë shumë herë më të koordinuar se ne dhe kjo është e habitshme. Nuk kishim nevojë për koordinim”.
Pjesë nga debati
Spaho: Tarifa që ju merrni parashikon depozitim dhe djegie apo vetëm depozitim?
Kodra: Tarifa 29 euro parashikon tërësinë e proceseve. Nga momenti kur vjen kamioni e deri te faza e fundit që do të jetë incenerimi.
Spaho: Pra nuk ka ndodhur incenerimi për vitet 2017-2020?
Kodra: Impiantet janë në fazë ndërtimore.
Spaho: Sapo kuptova që tarifa 29 euro përfshin nga hyrja e kamionit deri tek incenerimi. Keni marrë tarifën e djegies, sa është brenda 29 eurove, por djegie nuk është kryer?
Kodra: Është kryer tërësia e proceseve.
