Aleanca Qytetare për Mbrojtjen e Demokracisë, Basha mbledh pasdite Këshillin dhe Kolegjin

Partia Demokratike do të mbledhë në orën 18: 00 të pasdites Këshillin Kombëtar dhe Kolegjin e Kryetarëve.

Në mbledhje do diskutohet vendimi i Kryesisë së PD-së për krijimin e Aleancës Qytetare për Mbrojtjen e Demokracisë.

Kjo Aleancë do të krijohet ne 61 bashkitë si bashkim qytetar dhe intelektual, që do të ndërgjegjësojë qytetarët për rrezikun që sipas PD-së po i kanoset demokracisë në vend dhe marrjen e të gjitha masave për të mbrojtur rendin demokratik dhe kushtetues.

Aksion opozitar në çdo qytet ku Rama zhvillon takime elektorale

Pas deklaratës për shtyp të mbajtur pasditen e djeshme nga selia blu, dy ishin takimet e rëndësishme të përcaktuara në agjendën e kryedemokratit Lulzim Basha pasditen e kësaj të hëne. Sipas raportimeve Basha zhvilloi një takim me aleatët, takim ky i cili nisi rreth orës 18:00.

Ndërkohë, që më vonë, rreth orës 19:00, kryedemokrati do të mblidhte dhe Kryesinë e PD-së për të diskutuar në lidhje me situatën politike në vend. Në përfundim të mbledhjes së kryedemokratit Lulzim Basha me aleatët e tij politikë, ka folur kreu i PR-së, Fatmir Mediu.

Sipas tij, e gjithë opozita i qëndron asaj ç’ka Basha deklaroi sot në konferencën për shtyp nga selia e PD-së, se, janë të angazhuar për zgjedhje të lira dhe të ndershme, pa Ramën kryeministër.

“Ne vijojmë të jemi të angazhuar për zgjedhje të lira e të ndershme pa Ramën kryeministër. Qëndrimi ynë është i njejtë me atë që zoti Basha ka mbajtur në konferencën për shtyp sot (dje). Kjo ka qenë dhe mbetet pjesë e axhendës sonë”, u shpreh kryerepublikani Fatmir Mediu pas takimit në selinë blu.

Intensifikimi i aksionit opozitar tashmë do të shtrihet në të gjitha bashkitë e vendit. Kryesia e PD vendosi që t’i propozojë nesër Këshillit Kombëtar, krijimin e një aleancë qytetare për mbrojtjen e demokracisë në çdo bashki. Në mbledhje, Basha ka përsëritur qëndrimin e tij se nuk ka negociata me Edi Ramën. Krijimi i aleancës qytetare vjen si si intensifikim i aksionit politik për të ndaluar mazhorancën për zhvillimin e zgjedhjeve me 30 qershor. Po ashtu Kryesia ka diskutuar intensifikimin e aksionit ne çdo qytet kur Rama ka takim elektoral apo prezantim kandidatesh.

“Kryesia e Partisë Demokratike vendosi që t’i propozojë Këshillit Kombëtar të PDSH-së, angazhimin e strukturave të Partisë Demokratike dhe të Opozitës së Bashkuar në 61 Bashkitë e vendit për krijimin e Aleancës Qytetare për Mbrojtjen e Demokracisë. Kjo Aleancë do të krijohet si bashkim qytetar dhe intelektual, që do të ndërgjegjësojë qytetarët për rrezikun që po i kanoset demokracisë në vend dhe marrjen e të gjitha masave për të mbrojtur rendin demokratik dhe kushtetues”, njoftoi mbrëmjen e djeshme selia blu.

/Koha Jonë