Ambasadori shqiptar në OKB: Agresioni rus vetëshkatërrues, të ndalojë

Shqipëria ka mbajtur një qëndrim të fortë në mbështetje të Ukarinës, e cila sot u sulmua nga Rusia. Ambasadori i vendit tonë në OKB, Ferit Hoxha në mbledhjen urgjente të Këshillit të Sigurimit është shprehur se Shqipëria e mbështet pa asnjë kusht Ukrainën, pas agresionit rus të natës së 24 shkurtit.

“I bëjmë thirrje Rusisë të ndalojë dhe të reflektojë menjëherë. Misioni i tyre si një vend i madh në botë, është ta ruajnë paqen dhe jo ta prishin atë”.

Me këto fjalë, Hoxha theksoi se është e papranueshme, që Rusia të sulmojë në të tillë mënyrë vendet fqinje dhe të kërkojë pushtimin e tyre.

“Kjo është një orë e errët jo vetëm për Ukrainën, por për të gjithë komunitetin ndërkombëtar, pasi ne dëshmojmë me drithërimë përparimin e një akti të pastër agresioni të planifikuar me kujdes dhe të ekzekutuar me gjakftohtësi”, tha ai.