Basha, apel diplomatëve: Heshtja juaj po u ul besueshmërinë

Kryetari i Partisë Demokratike, Lulzim Basha ka reaguar sot në mbrëmje për ngërçin me sistemin e drejtësisë. Në një deklaratë në rrjetet sociale, Lulzim Basha u bën apel ndërkombëtarë që të reagojnë.

Ai thotë se heshtja e tyre po u ul pikë në sytë e qytetarëve shqiptarë që presin më shumë nga faktori ndërkombëtarë në Shqipëri. ” Partnerët ndërkombëtarë duhet të shqetësohen për mungesën e Gjykatës Kushtetuese dhe bllokimin e Gjykatës së Lartë nga Edi Rama, çka ka hequr çdo lloj kontrolli dhe kufizimi  të pushtetit të shumicës dhe ka vënë në rrezik të drejtat e njeriut në Shqipëri.  Heshtja e tyre ndaj kësaj gjendje ka ulur besueshmërinë e tyre në sytë e publikut shqiptar, i cili pret përmbushjen e premtimit që ata i bënë shqiptarëve se peshqit e mëdhenj do ishin në burg dhe jo në krye të qeverisë. Drejtësia pa të korruptuar dhe kriminelë në burg është tallje dhe jo drejtësi”,- deklaron Lulzim Basha.

Deklarata e Bashës është dhe një reagim ndaj qëndrimit të Edi Ramës, pak orë më parë, i cili tha la të kuptohet se ndërkombëtarët e miratojnë situatën në Shqipëri pa Gjykatë Kushtetuese dhe pa Gjykatë të Lartë.

Deklarata e plotë e Lulzim Bashës:

“Ndryshimet e propozuara nga Edi Rama të Ligjit për Statusin e Gjyqtarëve dhe Prokurorëve sanksionojnë që emërimet e të sapodiplomuarve në sistemin e prokurorisë dhe të gjyqësorit të bëhen nga PPP- Prokurorja e Përgjithshme e Përkohshme dhe KLD-ja e vjetër. Ky propozim është shkelje e hapur e Kushtetutës dhe kthim tek institucionet e vjetra që kishim para reformës në drejtësi.

Kjo shkelje e Kushtetutës bëhet në një kohë kur Gjykata Kushtetuese është shpërbërë dhe sistemi kushtetues në Shqipëri është i goditur rëndë. Qëllimi i këtij propozimi është kapja totale e drejtësisë nga Edi Rama përmes Arta Markut dhe KLD-së.

Prandaj Edi Rama i përgjysmoi para një viti buxhetin dhe burimet për vetingun, qëllimisht për të zvarritur vetingun dhe për të mos krijuar KLP-në, KLGJ-në dhe SPAK.

Partnerët ndërkombëtarë duhet të shqetësohen për mungesën e Gjykatës Kushtetuese dhe bllokimin e Gjykatës së Lartë nga Edi Rama, çka ka hequr çdo lloj kontrolli dhe kufizimi  të pushtetit të shumicës dhe ka vënë në rrezik të drejtat e njeriut në Shqipëri.

Heshtja e tyre ndaj kësaj gjendje ka ulur besueshmërinë e tyre në sytë e publikut shqiptar, i cili pret përmbushjen e premtimit që ata i bënë shqiptarëve se peshqit e mëdhenj do ishin në burg dhe jo në krye të qeverisë. Drejtësia pa të korruptuar dhe kriminelë në burg është tallje dhe jo drejtësi”.