Basha: Nuk do ketë fraksione në PD!

Lulzim Basha doli mbrëmjen e djeshme, vonë, në një prononcim për mediat pas mbledhjes së kryesisë që zgjati mbi 4 orë dhe u shoqërua me debate, ku shquhet përplasja mes Jemin Gjanës dhe Valbona Mezinit.

Duke i dhënë përgjigje gazetarëve për fraksionet në PD dhe zërat kundër, Basha u shpreh prerë:

“Sa kohë të jem unë kryetar i Partisë Demokratike, nuk do të ketë fraksione në Partinë Demokratike. Por do të ketë hapësirë për këdo demokrat që të kontribuojë për qëllimin e përbashkët që është një qëllim kombëtar, jo thjeshtë qëllim politik i Partisë Demokratike. Një qëllim kombëtar për të çliruar vendin nga zgjedha e krimit, nga bandat që qeverisin sot si aleate të denja të Edi Ramës që i përdori ata për për të marrë pushtetin”.

Po kështu ai foli edhe për vendimin e marrë në Kryesisë e Partisë Demokratike për të nisur menjëherë një proces analize dhe konsultimi me bazën demokrate duke përfshirë të gjithë simpatizantët e Partisë Demokratike. Qëllim, tha Basha, është reformimi i PD dhe bashkimi në përballjen me Edi Ramën dhe qeverinë e dalë përmes tjetërsimit kriminal të vullnetit të shqiptarëve.

I pyetur se si do të bëhet bashkimi i PD, ai tha se “bashkimi bëhet rreth atyre që demokratët nuk i kanë tradhtuar asnjëherë dhe që nuk i tradhtuan as me 25 Qershor; rreth vlerave, si shqiptarë, si patriote, si europiane dhe rreth qëllimit të përbashkët që është që ti shërbejmë qytetarëve dhe popullit shqiptar.