Basha për demokratët e LSI: Kthehuni në shtëpi

Lulzim Basha: Nuk do i prish palmat e Ramës

Lulzim Basha: Po pres arrestimet para zgjedhjeve!

I ftuar sonte në emisionin #DritaremeRudinën, kryetari i opozitës Lulzim Basha foli me nota kritike për projektin e rilindjes urbane të kryeministrit Edi Rama, duke e cilësuar atë si bukuri që vret dhe si prioritet që harxhoi qindra milionë euro: “Unë e quaj bukuri që vret sepse reflekton dështimin total të Edi Ramës dhe të rilindjes në katër vite për t’i shërbyer qytetarëve”.

Sipas z. Basha asnjë premtim nuk u realizua pasi Rama vendosi prioritete të tjera, si ajo e rilindjes urbane me palma të thara: “Rama nuk mbajti asnjë premtim se kishte prioritet rilindjen urbane. Unë e kam thënë edhe më parë, palma si pemë është e bukur, më pëlqen, pavarësisht se këto të Edit janë tharë të gjitha. Megjithatë puna është që palmat, pllakat, shatërvanet, kulla e Korcës të zënë sytë kur sheh hallet e shqiptarëve”, tha Basha në #DritaremeRudinën, duke shtuar megjithate se ai nuk do të prishe asgje nga cfare ka bëre Rama, por ndryshe nga ai, nuk do të ketë prioritet fasadën, por ekonominë.

Basha u shpreh në Vizion Plus, se ndonëse objektivi i tij ishte largimi i Kryeministrit Rama, ai i shërbeu interesit të vendit duke bërë një marrëveshje, që rrëzoi gjysmën e kabinetit: “larguam një tufë ministrash që ishin bërë gati të suleshin me lukuninë e administratës mbi votën e shqiptarëve, krijuam një klimë të re në raport me qytetarët. Ata kanë më shumë besim te procesi, zyrtarët që kishin ndërmend të abuzonin po struken e do të struken dita-ditës. Nja 30 drejtorë të mëdhenj e të mesëm janë shkarkuar, disa janë proceduar penalisht. Do të doja të shihja më shumë të arrestuar. Ministri i Brendshëm po bën maksimumin dhe shpresoj  që Drejtori i Policisë t’i përgjigjet sipas ligjit , e jo sipas urdhrave nga politika.

Po pres arrestimet, sepse disa e kanë vendin me masa sigurie, sepse Kodi Penal e parashikon që ata shkojnë minimalisht 1 vit prapa hekurave për abuzimin me detyrën në funksion të votës. I bëj thirrje Shtetit të zbatojë Kodin Penal që i çon prapa hekurave ata që sjellin apo marrin kartat e identitetit, ata që cenojnë votën, ata që premtojnë e mashtrojnë për votën. “

Rudina Xhunga:  Ju e quajtët LSI –SHPK  dhe z. Vasili menjëherë ju kujtoi SHPK -në tuaj që  “vodhi 250 milionë euro nga Rruga e Kombit”.

Lulzim Basha: E kanë humbur toruan ata të LSI-së, për arsye se e kuptuan që për herë të parë nuk do të jenë në pushtet. LSI  nuk do të jetë në pushtet.

Lulzim Basha: LSI nuk do të jetë në pushtet sepse ka abuzuar me pushtetin. Jo vetëm në këto 4 vite, por në 8 vite ka ndërtuar modelin e një partie klienteliste, pa axhendë, pa program që ngjitet pas çdo koalicioni, vetëm për të kapur vende pune dhe i paraprin fushatave  me para në dorë.

Ky model do të marrë fund, LSI-ja është bërë simbol i këtij modeli, LSI-ja nuk do të jetë në pushtet pas datës 25 qershor, kjo është 1000% e sigurt. Koalicioni që unë drejtoj do t’i fitojë zgjedhjet dhe ne do të qeverisim sipas një modeli që kurrë më nuk do të ketë vend për aleanca klienteliste dhe matrapazllëqe.

Rudina Xhunga: “Do ta  marrësh në telefon Petrit Vasilin pas zgjedhjeve” – ka thënë Meta.

Lulzim Basha: “Dream on” thonë anglezët, vazhdo ëndërro.

Modeli i LSI-së po ndëshkohet dhe do ndëshkohet me votë dhe unë uroj që ata të gjejnë forcën t’i rikthehen një modeli me të vërtetë parimor. Në qoftë se janë të majtë, siç thonë, atëherë duhet të veprojnë si e majtë dhe jo si një parti që shkon nga fryn era vetëm për të kapur vende pune, për të kapur tendera e koncesione.

Rudina Xhunga: Pjesë e marrëveshjes me z. Rama është kjo, që ta lini LSI-në jashtë çdo pushteti?

Lulzim Basha: Absolutisht jo. Kjo është pjesë e vendosmërisë time të shprehur prej 4 vjetësh si kryetar i opozitës. Demokratët e Shqipërisë kurrë më të mos kenë dyshim që unë, si kryetar i Partisë do të  bëj ndonjë pazar me LSI-në, sepse në qoftë se ky dyshim ekziston atëherë çdo demokrat s’ka pse të mos joshet nga shitblerja e votës me idenë se ne do jemi prapë në pushtet.

Sot dua t’i them çdo demokrati e demokrateje, ne nuk do të qeverisim me LSI-në, mos bëni gabimin fatal, përndryshe do të mbeteni si Baftjarë në hauret e Republikës së Vjetër.

Rudina Xhunga: Patët një darkë me z. Ilir Meta ndërsa ishit në çadër. Ia thatë këtë gjë?

Lulzim Basha: Nuk kam pasur asnjë komunikim jashtë parimeve që i besoj fort, parimeve për zgjedhje të lira dhe të ndershme.

Qëndrimet e Ilir Metës, pastaj e keni parë se çfarë përfaqëson. Tha që nuk do shkonte në zgjedhje pa opozitën, u regjistrua pa opozitën dhe filloi t’i bënte thirrje demokratëve “votoni për LSI”.

Rudina Xhunga: Është hakmarrje, atëherë kjo e juaja.

Lulzim Basha: Jo, jo, jo. Nuk jam natyrë hakmarrëse unë, nuk e kam pasur asnjëherë dhe nuk e kam, në karakter hakmarrjen.

Por kjo është e vërteta; LSI-ja nuk përfaqëson asgjë, asnjë shpresë për balancim të pushteteve, për frenim të egove.

Çfarë bëri me Edi Ramën? E frenoi Edi Ramën në marrëzinë e tij për shkatërrimin e themeleve të ekonomisë, për kanabizimin, për kriminalizimin? Jo. I bëri fresk, sepse i bënte presion dhe pastaj tërhiqej kur merrte koncesionin e radhës, punësimin e radhës, drejtorinë e radhës, tenderin e radhës. Pra, parti tipike klienteliste. I bënte fresk nga mëngjesi deri në darkë, bënte sikur po mbronte interesin publik, pastaj sapo mbyllte pazarin me Ramën, sapo merrte thelën e tepsisë, dridhe Like. Kështu ka ndodhur, për të gjitha aferat e mëdha.

Rudina Xhunga: Meta qëndroi deri në fund, i palëkundur nga ideja që opozita të merrte pjesë në zgjedhje.

Lulzim Basha: Tha nuk do marr pjesë, por pastaj u regjistrua dhe e filloi t’i bëjë thirrje demokratëve “votoni për LSI”. Ky ishte projekt i atij dhe i Ben Blushit se ndryshe nuk shpjegohet sesi u hidhëruan kaq shumë kur u regjistrua opozita. Kishin bërë plan të kapnin deputetë qyl dhe me deputetë qyl t’i bënin presion Edi Ramës për tepsinë e pushtetit. E gjitha, Rudina, është llogari e Republikës së Vjetër, llogari pushteti.

Rudina Xhunga: Ju kanë ikur njerëz tek LSI-ja, jeni i qartë besoj?

Lulzim Basha: Po, LSI-ja ka përfituar nga qëndrimet e paqarta të Partisë Demokratike.

Rudina Xhunga: Të paqarta të tuajat?

Lulzim Basha: Edhe të miat, pse jo. Edhe unë kam përgjegjësinë time për fushatën e 2013-ës.

Ata thanë ne mund të qeverisim prapë me PD-në, hajt se me PD-në do jemi, jepni një votë këtej, jepni ndonjë votë andej. Kjo padyshim ka shkaktuar amulli dhe kjo amulli merr fund tani. Me Partinë Demokratike, me opozitën, me Republikën e Re, LSI-ja nuk ka më asnjë shans të hyjë në matrapazllëqe dhe pazare. Çdo demokrat i tjetërsuar, i skllavëruar me teserën e LSI-së, apo me vend pune nga LSI-ja, tani ka shansin të rikthehet në shtëpinë e tij, në shtëpinë e saj, e presim zemërhapur, nuk kemi asnjë zemërthyerje për çfarë ka ndodhur se edhe ne kemi përgjegjësitë tonë që i pranojmë.

Por ama janë të paralajmëruar, ky është momenti të kthehen në shtëpinë e tyre, përndryshe në haur me Baftjarët e Republikës së Vjetër./dritare.net