Britania: Thirrjet për ndryshim kufijsh janë destabilizuese

Teza e ngritur nga Presidenti Hashim Thaçi për korrigjim të kufijve mes Kosovës dhe Serbisë, duke kërkuar që Lugina e Preshevës t’i bashkohet shtetit të tij, ka ngritur jo pak debate.

Mbi këtë çështje reagon edhe Britania. Ambasada e Britanisë së Madhe në Kosovë, ka thënë se thirrjet për ndryshim të kufijve të Ballkanit mund të sjellin destabilizim. ”Ne besojmë se thirrjet për modifikim të kufijve nacionalë mund të jenë destabilizuese”, ka thënë kjo Ambasadë në një përgjigje për Radion Evropa e Lirë.

”Ashtu siç kemi qenë gjithmonë të qartë, normalizimi i marrëdhënieve mes Kosovës dhe Serbisë është vendimtar për sigurinë, stabilitetin dhe prosperitetin e të dyja vendeve dhe rajonit në tërësi. Qeveria britanike beson se kjo duhet të jetë në bazë të njohjes së vendeve të pavarura brenda kufijve të tashëm. Ne vazhdojmë ta mbështesim dialogun të lehtësuar nga Bashkimi Evropian me qëllim të gjetjes së një zgjidhjeje gjithëpërfshirëse dhe të qëndrueshme me të cilët përfitojnë të dy vendet”,-thuhet më tej në qëndrimin e Ambasadës.