Çfarë po ndodh? Ambasadorët në kryeministri, dy ditë para seancës parlamentare

Dy ditë para seancës konstituive të parlamentit të ri të dalë nga zgjedhjet e 25 qershorit, ambasadorët e vendeve të BE-së në Tiranë kanë zhvilluar një vizitë në Kryeministri. “BalkanWeb” raporton se ambasadorët janë parë në godinën e Kryeministrisë por nuk dihet se me kë janë takuar.

Ndërkohë ditën e nesërme janë parashikuar edhe mbledhjet e grupeve parlamentare PS dhe PD. Tre ditë më parë Ambasadorja e BE-së Romana Vlahutin ka folur rreth qeverisë së re, më e vogël në ministri duke u shprehur e paqartë lidhur me mekanizmat e bashkërendimit të BE, referuar shkrirjes se Ministrisë se Integrimit.

“Ka ende disa paqartësira lidhur me ndryshimet që do të kemi sa i takon mekanizmave të bashkërendimit të BE. Ndaj unë do të kem disa takime në ditët në vijim”, tha Vlahutin.

Deklaratat e saj ambasadorja e BE i bëri gjatë Shkollës Verore Europiane që u mbajt këtë të hënë në ambientet e Kryesisë së Kuvendit.