Çfarë po ndodh me qeverinë “Rama 2”! Nuk ka Integrim të vendit në BE?

Gjosha dhe Bushati replika “flakë për flakë”

Kryeministri Rama, gjatë fjalës në Asamblenë Kombëtare të PS-së, foli për një qeveri të vogël, në të cilën do të bëjnë pjesë vetëm 11 ministri, duke shkurtuar 8 ministri që funksionuar gjatë mandatit të parë.

Edhe pse Kryeministri ka premtuar integrimin e vendit sa më shpejt drejt BE-së, sot suprizoi me heshtjen e tij ndaj Ministrisë së Integrimit, e cila gjatë mandatit të parë të koalicionit qeverisës, PS-LSI, ka qenë nën drejtimin e Klajda Gjoshës, deputete e LSI-së. Kjo ministri nuk do të jetë më në qeverinë e re, “Rama 2”. Kryeministri nuk foli për Ministrinë e Integrimit, as kur përmendi Ministrinë e Jashtme. Kjo ka shkaktuar dyshimin se kjo qeveri nuk do ta ketë prioritet Integrimin e vendit drejt BE-së?

Kjo nga nxitur reagimin e ish-Ministres së Integrimit. Klajda Gjosha në një reagim në facebook, është shprehur se mbeti e befasur nga fakti se Kryeministri nuk foli për prioritetin madhor të Shqipërisë, që është Integrimi Europian i vendit.

“Mendova se sot qeveria e re do të niste me prioritetin madhor të Shqipërisë dhe shqiptarëve që është integrimi europian i vendit, me vizionin apo strategjinë se si Shqipëria do të shkojë drejt çeljes së negociatave”.

Deputetja e LSI-së, theksoi më tej se integrimi kërkon një koordinim procesesh e që ka një mori kriteresh. “Integrimi nuk është shpallja me zhurmë e qeverisë se re dhe as mbledhjet e Asambleve të partive politike, përkundrazi është një mori kriteresh, një koordinim i pafundëm procesesh e mbi të gjitha është seriozitet dhe respekt për institucionet dhe funksionimin e tyre”.

Në fund, Gjosha shtron pyetjen se nëse integrimi nuk do të jetë më prioritet i qeverisë? “Jam e bindur se Ministria e Integrimit do të atashohet diku në ndonjë cep të qeverisë por kurrë nuk kisha menduar se as nuk do të përmendej në fjalën e mbajtur sot mbi qeverinë e re! Thua vallë nuk është më prioritet? Uroj të jem gabim për sa kohë kemi fëmijë që rrisim në Shqipëri dhe ku e vetmja shpresë për një shtet funksional është pikerisht ky proces historik i vendit”.

Shqetësimin e Gjoshës, e ngriti edhe ish-Ministri i Jashtëm, deputeti i zgjedhur i PD, Tritan Shehu. Ai shkruajti se në qeverinë “Rama 2”, mungon Ministria e Integrimit. “Paqartësia: Nuk u deklarua as bashkimi i kësaj me Ministrinë e Jashtme! Lapsus, mister, apo nuk ka më Integrim Europian!?”, shkruan Shehu.

Këto paqartësia për Integrimin, “detyruan” Ministrin e rikonfirmuar në Ministrinë e Jashtme, Ditmir Bushati, të reagojë. Në një postim në rrjete sociale, pas shqetësimit të ish-Ministres Gjosha, Bushati shprehet se Integrimi do jetë kryefjala e reformave, ku edhe ftoi ish-Minisres që të jetë pjesë e këtij kontributi.  “S’ka vend për shqetësim. Integrimi në BE do jetë kryefjala e reformave tona. Mirëpresim kontributin e opozitës, përfshirë tëndin Klajda”, shkruan Bushati.

Në një reagim pas Ministrit Bushati, Gjosha shkruan se LSI-ja ka kontribuar dhe ajo personalisht si Ministre, që Shqipëria të ec më shpejt drejt BE-së. Sipas Gjoshës, ajo do të kontribojë që vendi të shpëtojë nga korupsioni, krimi i organizuar.

“Pa merak i dashur Ditmir, kontributi i LSI-së dhe i imi personal do të jetë gjithnjë në funksion të procesit të integrimit, pasi vetëm kështu Shqipëria do të shpëtojë njëherë e mirë nga: korrupsioni, krimi i organizuar, blerja e votës. Ndaj dhe ndjejmë keqardhje, që flamuri për këtë proces ngrihet nga qeveria dhe Kryeministri sa herë i intereson dhe harrohet që është prioritet kombëtar i të gjithë shqiptarëve e nuk përmendet në këtë mandat të dytë! Suksese!”