Deklaratat e Bashës për helmimin, reagon PS: Mos u merr me konspiracione

Partia Socialiste ka reaguar pas deklaratave të kreut të PD-së Lulzim Basha për helmimin e dhjetëra qytetarëve dhe të atij vetë në mitingun e PD-së dje në Tiranë.

Në një deklaratë për mediat, PS thotë se drejtori i QSUT-së ka qenë pranë njerëzve që shfaqën simptoma që prej orëve të para të mëngjesit, ndërkohë që Drejtori i Përgjithshëm i Policisë ka urdhëruar sigurimin e hapësirës publike ku u zhvilluar aktiviteti i djeshëm. PS thotë se të gjitha institucionet po punojnë dhe i kërkon PD-së të mos merret me teori konspiracioni.

DEKLARATA E PS
Ditën e sotshme, në orën 5:00 të mëngjesit, drejtori i përgjithshëm i Qendrës Spitalore Universitare të Tiranës ishte pranë njerëzve që kërkuan ndihmë për simptomat e shfaqura. Gjysmë ore më vonë, drejtori i përgjithshëm i policisë urdhëroi sigurimin e hapësirës publike ku u zhvillua aktiviteti i mbrëmjes së djeshme dhe hetimet vazhdojnë ende. Pra, institucionet po punojnë dhe të gjithë autoritetet përkatëse ishte gati për të ofruar ndihmesën e vet.
Thënë kjo, ne i bëjmë seriozisht thirrje PD-së që të përqendrohet te çështjet e vërteta të fushatës dhe të mos merret me teori konspiracioni.
Partia Socialiste i uron shërim sa më të shpejtë të gjithë të lënduarve, dhe veçanërisht liderit të Opozitës. Ne dëshirojmë që ai të bëjë fushatë dhe jo të flasë për konspiracion, gjë e cila tregon se në çfarë gjendje të çoroditur është Partia Demokratike.